Saturday, March 18, 2006

Udah Pulai

Temuai aku udah pulai .. pulai ngagai rumah anak menyadi iya di Milpitas, California. Pangan aku tu pulai ka Kuching kena bulan empat tu ila. Ko iya, enti aku bisi ka Kuching dudi hari ila, anang enda bemalam ba iya. Ngelama tu aku bemalam ba rumah pangan aku ba St Faith's flat/vicarage. Diatu aku udah bisi anak dua iko, enggai nyadi bemalam ba pangan aku ba St Faith agi. Pangan aku nya udah bisi empat iko anak. Apu balat utai munyi dia enti di tambah enggau anak aku empu!

Kami sebilik endang bisi ati ka pulai ujong bulan lima tu ila, lalu enti nadai penanggul lalu enggau sida apai indai aku ka menoa .. Nanga Drau, Saratok.

Tang diatu bisi penyakit HFM, errr, enti bulan lima tu ila penyakit nya agi bisi di Sarawak, engka enda nyadi pulai maya nya. Takut endar aku berunding ka penyakit nya ngerampit bala anak aku. Saduai agi mit, endang maya iya penyakit nya tau nganu.

Sinu endar macha pasal bala anembiak ti mati tegal penyakit nya. Ari ni penyakit nya datai, neh. Iran endar ati berunding pasal chukop macham penyakit. Agi mit suba nadai kala ninga penyakit baka nya. Kati nadai bisi vaccine kini kena kitai ngenan anak mit ari kena jangkit penyakit nya? Arap ka bisi meh dudi ila tetemu ka vaccine kena kitai nuchok anak kitai awak ka enda kena rampit penyakit HFM agi.

Pulai baru ngagai cherita pangan aku ti baru nemuai tu tadi. Kami duai sempat ngaga siti quilt, tang bedau entu tembu .. mina ka nyait binding nya agi laban enggai enda di jait ngena jait jari, awak ka manah agi di peda ... baka reti kitai nyait hem ba skirt.

Minggu baru kami ka ke Nipomo, alu mai pangan aku nya. Sida entua aku diau di Nipomo. Lama udah kami enda kin ... ka ngena peluang tu mai pangan aku meda menoa din. :-) Maya nya ila aku meri quilt ngagai iya .. guarantee udah tembu maya nya ila!

Tu iya quilt digaga ka pangan aku, Catherine.

4 comments:

  1. Anang guai pulai, kes HFM ditu diatu dah ngerampit area rumahpanjai....tusah ati ngenang ka nya....especially being parents with kids below 10 yrs... :(

    ReplyDelete
  2. Nya lah, bala sisters-in-law aku enda ngasoh pulai .. nganti penyakit nyau nadai agi. Aku pen takut mai bala anak enti penyakit nya agi ngerampit bala nembiak.

    ReplyDelete
  3. sikop pensyarah ari univ Malaya madah factor ia Sungai Rejang kamah. Pansyarah enda pandai aja ngaga statement bakanya nadai ngaga kaji selidik terus nyangka ngapa. anak mit bandar paling maioh kena penyakit tuk kelebih agi ari kuching paling maioh kes mula mula kati tau sida tuk dikaitkan enggau sungai rejang, kada kala meda sungai rejang sekeda sida tuk deh? enti amat faktor ai munkin dibai hujan, ukainya ari pencemaran udara ditu aja, mungkin ari menua bukai baka ari kalimantan and sumatera. enti enda ngaga kajian di makmal kati sida tau ngambu factor penyakit tuka baka sungai rejang. iklim dunia sigi tang berubah setiap tahun endang enda ulih dikekalkan, bentuk muka bumi pun berubah, maioh agi mikroorganisma yang bermutasi menyesuaikan diri enggau faktoor persekitaran, bisi nya mikroorganisma zoonik suba enda tau nganu manusia diatu tau nganu manusia enti ia bermutasi dan maioh faktor lain. nya meh RESEARCH AND DEVELOPMENT patut digaga maioh agi ba Univertiti awak ke pensyarah enda tinduk aja and buruk, mencuri hasil kajian pelajar aja-aja, diri empu enda turun ke lapangan temu ngaga bup ngene idea orang bukai aja.

    ReplyDelete
  4. Issh, enda berapa! Amat ko nuan, kada bisi ngada study amat amat pasal sungai rejang.

    Enchuri hasil kajian bala students? Apu, enda berapa ka pensyarah nya?!

    ReplyDelete

Related Posts Plugin for WordPress, Blogger...