Sunday, August 13, 2006

Kenyang!

Lemai tu kami menyanak makai belauk ka kari dagin, tugey guring bechampur enggau ikan masin but. Ikan masin but? Au ah, bisi tulih ka ikan masin ba supermarket cina kami ditu. Naka pengaga ati tetemu ka ikan masin but (salted mackerel in oil).

Enda beresai nembu ka asi sepinggai! Nyuap menyuap! Heheh. Ko aku madah ka Doug, asai ka makai dirumah indai aku din. Kipas bepusin, enggau lagu Iban bemain ba belakang. Heheh.

Dia aku alu bekenang ka dua iko pangan aku ditu ti belaki ka bansa ribai mega. Siko ari saduai, laki iya tak sigi enda makai lauk pandok stail Malaysia. Ka siko pama agi mina enda entu ka makai lap chong, enggau enggai makai pau. Ko aku madah ka Doug, endang beterima kasih amat aku laban iya enda milih. Belachan, ikan masin, lauk pedas, buah rian endang sigi ka magang.

Bah kati pemakai kita ti bebini ka indu ribai deh, Aki Gerubi? Bisi kala belauk ka ikan masin, kari dangin, enggau makai tugey guring? Kada ka indu ribai ka ngenat rumah bebau ikan masin but ti udah diguring?! Haha.

~~~~

Agi bekenang ka ikan masin but .... maya aku ngirum care package ngagai Mag kutai, aku bisi ngirum sebutul ikan masin nya. Kari dagin ti dipandok aku lemai tu tadi, ngena kari ti dikirum Mag .. kari ari Thailand. Nyamai ga dipandok enggau dagin.

Aku bisi mega ngirum tiga butul ikan masin but ngagai pangan aku (indu melayu - classmate ari Miri) ba Indiana. Iya madah nadai tetemu ka ikan masin nya ba endor iya diau din. Nya ko iya, lama udah enda makai ngenyamai asi chelap di-empa enggau ikan masin but guring! Lichin periok asi ko iya!

Pagila aku deka ngirum dua butul ngagai pangan aku (indu Iban, pangan lama ari Miri) ba Maryland. Lemai tu tadi aku bisi betelipon enggau iya, dia iya bisi bekenang ka lauk babi di stim enggau ikan masin baka ka ti pandok kedai Wong ba Lutong din. Haha, tengok aku ninga nya, bisi meh hari tu ila nguji mandok ikan masin enggau babi.

Iiisshh, amat kenyang makai lemai tu tadi! Amat asai ka makai ba rumah indai aku di Miri din. Haha, laban ka bisi lagu Iban bemain ba computer ari IOR FM. (Laptop aku sigi ba dapur alai iya!)





5 comments:

  1. Stidi kita wai, ulih makai tugey guring ngena ikan masin. Nasib meh punggal Doug nya ulih makai semua stail pemakai kitai ari menoa sepiak tu neh.

    Enti enda semina ngenang meh Puteri deka makai pemakai bansa nya, kekeke. Petai nadai kita dia neh wai?

    ReplyDelete
  2. Amat stidi apai tuai aku nya, eh! Enti enda baka nya, nadai ko enggau meh, iya berapi kediri empu ga! Kekeke!

    Petai tu, aku empu enda entu minat, tang asai aku kala aku meda dalam tin ba supermarket cina nya .. ma udah dalam tin, nyu enda sama asai ke fresh, baka aku ti makai nangka muda dalam tin, tauka upa (palm heart) dalam tin .. tang tau ga di kenyadi eh!

    ReplyDelete
  3. Aduhhh endu..nama nya tak nyuruh aki meliur enda tentu ehh. Enggi kami tu nadai negu ikan masin, tang kari apooo naka peneka. Maya tetengukka ikan masin tudah aki dinnnn di luar berapi ehhh..laban grill bisi burner nyamai bepandukka utai bakanya di luar, enda pia! Aku pan bakanya meh, kadang kadang kediri laban enda ulih nitihka pemakai sida iya hehehehe. No grit for me lah!! Bala nembiak deka makai tugey nya..I never like petai ahhh. Perut tak enggai nerima!!!

    Keep on blogging endu..

    ReplyDelete
  4. sound yummy!, nyu ngasuh aku lapar aja macha post nuan tuk deh....

    ReplyDelete
  5. puteri sedapnya lauk...hehe..lelengau ke menua wai..bestnya laki nuan kak makai utai bakanya neh enda milih manah meh nya..ulih ga alai muai pengelengau ati ke menua enda pulai nyumai utai ke sama engagu selalu dipakai ba menua diri pen cukup neh..samalah enti aku lelengau ke org ba rumah aku ngiga lauk keselalu disumai mak aku tauka lauk ke kak dipakai mak aku dah nya mulalah projek nyumai enda sedap pen amai bisi muai pengelengau...

    ReplyDelete

Related Posts Plugin for WordPress, Blogger...