Wednesday, March 14, 2007

Enda Betah

Hari empat nyin tadi sida entua aku bisi datai nemuai. Maya sida pulai hari minggu tu tadi kami menyanak alu enggau sida pulai. Kebuah kami pulai enggau sida laban ti ka ngambi van ti diberi sida ka kami. Kami mina bemalam semalam enggau sida udah nya pulai ka Galt hari siti mai van ti diberi sida ka kami.

Tang mina kami tiga Duncan aja pulai. Denice ditinggal enggau aki ini iya di Nipomo. Sinu endar ati Duncan. Sepemanjai jalai iya nyabak ka Denice. Iya madah ka diri ka enggau Denice tinggal ba rumah aki ini iya. Kasih endar aku ninga iya. Enda betah iya nadai Denice. Datai kami ba rumah iya nyabak baru. Me want Denice, ko iya. Me miss her.

Ko entua indu aku, Denice gaga endar tinggal enggau aki ini iya. Nadai orang bukai dikiroh aki ini iya. Enda aku nyangka iya betah ditinggal kami. Nadai kala iya ditinggal kediri, mina maya iya baru ada suba.

Lemai kemari aku ka endar ketawa meda Duncan nyabak bediri nunga gambar aki ini iya. Papa Nana, ko iya. Me miss Papa Nana. Sikok sikok nyabak nunga gambar!

Hari enam tu ila baru kami ngambi Denice pulai. Entua aku madah anang kiroh dreba ka Nipomo. Lak ka betemu ba siti tempat, udah nya kami tau pulai ka Galt. Enti enda kami enggai enda bemalam ba Nipomo laban kelalu jauh.

Naka pengaga Duncan meda Denice tu ila. Denice nadai nemu lelengau ka Duncan. Gaga iya nadai orang enggau iya berebut ka ayam!

6 comments:

  1. Amat kasih tudah Duncan nemu lelengau ke tudah Denice. Pama ga Denice betah ditinggal engka laban udah bisi "feel" tinggal enggau ini aki iya diMiri. Bala uchu aku bakanya meh, ma siko nadai dipeda, lalu begiga ke pangan diri tang ma dah begulai, ka amat berebut ke ayam lalu belaya. Suah senyum aku meda ulah bala anembiak mit tu. Good day to you and have an enjoyable week ahead...

    ReplyDelete
  2. Nya lah, Duncan sigi nemu ngiga Denice enti iya nadai enggau iya. So far, Denice doesn't seem to be missing any of us. Enjoying all the attention she is getting from her grandparents! Mayoh utai dibeli ini ka iya .. gari, ayam .. gaga endar iya!

    ReplyDelete
  3. kasih endar iya..enti semak belaya ga..enti jauh enda betah..sigi gaya..kasih meda gamal iya nyabak..nuan tuk pun satu ga..org nyabak..di ambi gambar..apa la..anyway i really like tat new hairstyle of urs..sigi baka indu 'mem' nyak meh ;P

    ReplyDelete
  4. ala..kasih tudah duncan...sinu endar meda ya nyabak bakanya...seduai teleba begulai nya la iya asai enda nyamai lebuh siko nadai..denice pun betah neh enda ngiga bala kita..enda ngawa duncan enda lama agi ari 6 ulih betemu ngau denice ok...

    ReplyDelete
  5. apu! sinu amai ah meda gamal tudah duncan nyabak...
    nyau geli ga ati teingat ke aku enggau akak aku empu suba. ma cuti ia pulai ari kolej abdillah KCH belaya aja2 kami duai. Tang enti ia mupok belajar kin baru, rauh2 ga aku ngiga ia... hehehe.. sigi baka perangai diri menyadi meh nya...hehe

    ReplyDelete
  6. Amat ko kita, ma udah begulai lagi selalu belaya, nyau lelak ninga saduai nyabak. Endang ninting hari Duncan nyebut, me want Denice back. Kasih tudah, enda betah nadai menyadi enggau iya ditu.

    ReplyDelete

Related Posts Plugin for WordPress, Blogger...