Wednesday, February 18, 2009

Kek enggau Sushi

Kemari aku ngelaban ujan nurun ngagai restoran Jepun laban tenguk ka makai sushi. Aku diatu enda ibuh nganti orang enggau makai ma udah ka! Kediri meh aku makai sushi serta ngirup teh. Nyamai endar ga makai tengah hari ba restoran nya laban nadai entu mayoh orang.

Rainbow sushi ba restoran Mama's Sushi.

Taja gamal kitil nya mit, iya berat endar! Bisi sekilo pemerat iya enti enda lebih! Udah kenyang asai perut, mupok ga aku ngambi bala anak pulai sekula.

Tu tadi aku ngbasa blog Lyana, tenguk ga aku meda kek ka digaga iya. Ngetu ba blog Entayang baka nya ga. Ka mungkal ngaga kek lembau ga asai tulang. Ngena endar ga bisi kek mix. Mina nambah teluk, minyak enggau ai, nyadi meh kek.


Kebendar aku enda entu minat makai kek cokelat, tang munyi ko aku tadi, tak tenguk meda kek cokelat digaga Lyana. Bekareh meli kek mix ari supermarket alu ngaga kek tengah hari tu tadi.

Sedap endar bau kek ka udah mansau sebelah rumah!

Laban ka nagang diri makai utai manis, enda tebal krim cokelat disapu atas kek. Ba nyawa aku agi meh nya manis.

Bah, kati bala kita, nama lauk ka dipandok kita tengah hari tu lagi?

2 comments:

  1. a... nyamai mat nya... enda sabar ka pulai ke rumah ulih masak kek enggau adikku... huhuhuh... *dahkini

    ReplyDelete
  2. hahaha udah kena jangkit ngaga kek nuan neh Doris..aku ka belajar ngaga traditional kuih..tapi alu bedau bisi resipi betul.

    sedap amat kek nuan nyak..

    ReplyDelete

Related Posts Plugin for WordPress, Blogger...