Pemerindang Puteri - Blog Anak Iban Belelang

Selamat Taun Baru 2012

2012-01-01T16:18:00.000-08:00

Bala temuai nyambut Hari Krismas enggau kami sebilik & dibai raun meda Sacramento

Aku nadai enggau orang begau ngangkat gelas ai pengayu malam 31hb Disember tu kemari. Tumu nganjung diri tinduk laban ti rungguk . Nyawa semadi ulih dibai bejaku. Aku ka nelipun indai aku di Miri meri jaku Selamat Taun Baru deh enda ulih. Amat ngumba endar ga tubuh enggai enda rungguk maya ujung taun!

Raun ke Jackson enggau Placerville

Siang hari 31hb Disember, kami menyanak bisi mai temuai kami ari Vietnam meda menua Placerville. Udah ke puas musin pasar Placerville kami bisi ngetu makai malam ba Oz Korean Barbecue di Sacramento. Nyawa aku endang ari pagi udah raguk, tang isi aku bedau asai nyilu. Bisi endar nyawa dianjung makai Korean Barbecue, ah. :-) Bendar ngulam kimchi!

San Francisco

Hari siti udah Hari Krismas, bala temuai dibai kami raun meda menua San Francisco. Tebal amat kabus sahari nya. Golden Gate Bridge lindung laban kabus. Asa ati bala ti ka ngambar Golden Gate.

Rajin amat saduai melaki bini besaup nulung aku berapi! Posing dulu sebedau mupuk.

Sahari tu udah mupuk bala temuai - sembilan malam sida begulai enggau kami. Gaga amat bala anak bisi kawan baru enggau bemain. Enggai pulai pulai anak kawan aku ke biak. Iya enggai pulai ke Vietnam ku iya, agi ka diau enggau kami bemain Wii. Sinu amat Duncan saduai Denice meda bala kawan baru udah mupuk pulai. Arapka dudi hari ulih betemu baru di Vietnam tauka di Malaysia tauka ba US ditu.

Naka tu aja cherita aku kena 1hb Januari dalam taun baru 2012. Arapka kita semua lantang, gerai enggau diberkat Allah Taala belimpah limpah dalam taun baru tu. Selamat Taun Baru 2012!

Pengawa Ujung Minggu

2011-12-20T20:59:00.000-08:00

Maya kami menyanak ke Los Osos ujung minggu tu tadi, kami duai Doug sempat makai malam ba Great American Fish Company ba Morro Bay. Morro Bay enda entu jauh ari Los Osos. Bala anak diambi aki enggau ini saduai pagi nya, dibai saduai bemalam enggau saduai. Lantang meh kami duai Doug pegi date night!

Aku enda entu ka dibai Doug bejalai meda waterfront udah ke badu makai. Chelap!

Hari siti, kami menyanak dibai entua aku makai ba restoran ba Pismo. Early Christmas dinner, ku iya. Bala menyadi Doug enggau laki sida, enggau siku ipar entua aku enggau kami makai lemai nya. Tu gambar di ambi ari jendela restoran. Sayau amat mata panas padam di lindung remang ba tisi langit.

Kiraka enda ngatur Christmas dinner ba rumah iya meh entua aku taun tu laban udah mai orang makai ba restoran! Kami menyanak sigi enda nemuai ngagai sida maya Christmas tu lagi laban ti bisi temuai maya nya ila.

Bah, udah sedia nyambut Hari Krismas?

Cherita Tengan Bulan Dua Belas

2011-12-17T21:54:00.000-08:00

Tu meh sekeda gamal hari tumu pagi ba menua kami dalam bulan dua belas tu. Minggu nyin kemari lima hari beturut turut embun meku ba tanah. Pagi hari lima tu kemari baka nya ga hari. Tang selalu iya ma udah ngalih tengah hari, kabus mupuk nadai agi.

Mua hari udah terang, nadai entu tampak kabus agi, maya kami ke berangkat mupuk ke menua sida entua aku hari lima tu tadi.Kami menyanak sempat ngetu enda lama ba San Joaquin Valley National Cemetery laban kami udah besemaya enggau auntie Doug ka ngambar pendam niang laki iya. Niang uncle Doug soldadu ba perang Korea enggau Vietnam, nya kebuah iya tau dikubur ba National Cemetery. Iya mati tegal cancer, ukai mati maya beperang.

Peda ulah Duncan bema ma enggau Denice. Iya madah iya enggai ngindik orang ke ba baruh tanah, nya iya ngasuh Denice ngema iya!Wreath ke ditinggal kami ba pendam niang Uncle Doug ulih aku meli udah nya di hias aku ngena bunga enggau ribbon. Maya Thanksgiving bulan nyin kemari kami ti ka ngetu ba pendam uncle Doug tang ujan maya kami ti mansa menua nya, lalu maya ke pulai ari Los Osos hari udah petang laban hari sigi tumu petang maya bulan dua belas. Alu enda nyadi.

Bala nembiak udah berengkah kemisi musim Krismas nya kami menyanak ngambi peluang nemuai ke Los Osos baru maya ujung minggu tu. Maya Krismas tu lagi aku bisi temuai, bala pangan ari Vietnam. Nya ga siti kebuah ka nemuai ngagai sida entua kala ke ulih. Ku entua aku lemai tu tadi, lemai pagila iya ka mai kami dinner - early Christmas dinner, laban kami enda betemu maya hari Krismas tu ila.

Bah, kati bala kita, udah besedia ngintu Hari Krismas? Aku bisi ngaga kuih makmur kutai, tang berapa leka agi tinggal! Kek buah alu apin ngaga - nya ka aku ngalau ngambika bisi di sepi pangan ari Vietnam!

Selamat Hari Krismas ngagai bala kita ti ngintu hari besai tu!

Mua Enda Nemu Malu - Bagi Dua

2011-12-14T14:02:00.000-08:00

Aku sigi mereti pan Jane Barandi! Nuan ngasuh aku go ahead, go ahead meh aku bekenang ke cherita pasal nuan ti "enda jugau" tu!

Uji tak badu nuan rah rah nganu orang, badu orang bejaku pasal nuan. Cherita ti dikenang aku enggau pangan aku iya nya pasal anak petunggal nuan ti dadak nya, tang laban nuan ti enda nemu nagang dilah diri empu nyau NUAN nyadi cherita!

Kiba kanan madah orang nampung jaku bula (90% bula, ku nuan), kiba kanan madah orang jai, kiba kanan berani besumpah madah diri betul - bah padah ke aku, ni bagi utai ke ditulis aku dulu agi ari tu ti bula?

Iya bula cherita pasal anak petunggal nuan ti ngaga diri kena kidnap? Bula nuan ti bisi mansut jaku nganu orang ti bekenang ke pemeli Shirra? Bula nuan nadai memunyi lebuh nuan ninga rita pasal anak petunggal nuan udah ditemu? Dini alai nuan meri jaku terima kasih enggau jaku lantang ati ngagai orang ti bisi besampi ke Shirra udah iya ke ditemu? Ba Facebook Wall nuan? Aku ka meda! Iya ke bisi dipeda ba Facebook Group siti. Udah siku ari geng dia mantai berita surat kabar pasal Shirra, nuan alu begaut nginsil posting nya! Malu?

Baru diatu nuan ti bisi mansut jaku "terima kasih" ke orang ti irau sereta besampi ke Shirra. Semadi meh ninga orang madah nadai ninga jaku munyi nya ari nuan udah Shirra ke ditemu! Jaku terima kasih ti diselit enggau jaku bukai ti nganu orang! Jaku terima kasih ti diselit nuan lebuh ke rah rah ngasuh orang badu agi "begossip", diselit ba jaku ti bejai ke orang ti berani bejaku pasal anak Iban ti benama Shirra ti dadak nya!

Gossip pasal berita ba surat kabar? Ukai gossip nya! Sigi enda ulih di tagang pan orang bekenang ke berita ba surat kabar. Kelebih agi enti nya berita pasal anak Iban ti ngereja pengawa beli baka anak petunggal nuan ti benama Shirra nya!

Arapka nuan amat nitih jaku nuan empu meh, Jane Barandi - surrender in Jesus' name. The sooner you shut your mouth, the sooner this story will die down, and the sooner people will stop talking about you and your intemperate responses.

Mua Enda Nemu Malu

2011-12-12T14:04:00.000-08:00

Perati manah manah ke mua indu ke benama Shirra George nya! Udah nya kitai ke bisi anak indu anang enda ngajar anak kitai - ajar ngambika enda dadak baka Shirra!

Keterubah iya aku ninga berita Shirra kena kidnap ari auntie iya Jane Barandi, ukai enda kesal agi ati aku. Kati enda madah diri kesal? Nadai siku indu tauka nembiak ti udah di kidnap di menua Malaysia ditemu idup. Kesal sereta sinu ke apai indai iya ti irau ke pendiau iya - selamat tauka enda, idup tauka mati?

Nyau meh aku enggau bala pangan aku besampi ke Shirra. Besampi minta Petara ngelindung iya alu mai iya pulai selamat ngagai apai indai iya. Auntie iya Jane Barandi bekunsi ba Facebook minta orang besampi ke Shirra. Aku dataika enda entu tinduk ngenang ke Shirra ti kena kidnap taja aku empu nadai ngelala tauka kala betemu enggau orang ti benama Shirra.

Nyamai amat ati aku ninga iya udah selamat ditemu tang udah nya ringat - ringat laban apai indai iya enggau bala kaban iya, enggau kitai ti udah bekenang enggau besampi ke iya tu tadi sama bela udah dikemeli iya! Sapa kitai enda asai udah dikemeli lebuh ke macha berita ba surat kabar cherita Shirra ti kena kidnap tu tadi UTAI GAGA MAGANG!

Nama kebuah? Laban ti ka begulai enggau boyfriend sereta ngelalai ke diri ngandung, pia?! Amat nadai untak meh kitai sanggup ngenusah sereta nge-irau ke ati apai indai! Lebih ari dadak!

Nyau meh bala kami bekenang ke pemeli ulah Shirra nya tadi. Tambab! Tampar enggau mua! Ngenusah ke orang! Ngiruh ke orang!

Oohh, enggai amat auntie Shirra, Jane Barandi, ninga kami ti bekenang ke penambab Shirra tu tadi! Gossip! Busybodies! Nosy! Mind your own business! Nothing to do with your family! Menyebuk! Nobody is perfect!

Rangap rangap magang bala macha jaku Jane Barandi! Ni jaku meri terima kasih ke bala ti udah besampi ke anak petunggal iya? Ni jaku ti nusui Shirra udah ditemu selamat? Ni jaku ti madah diri malu sereta kesal ke ulah Shirra?

Seleka jaku anu nuju anak petunggal iya nadai meh ninga ari mulut Jane Barandi. Temu nganu orang ti bekenang ke pemeli ulah Shirra nya aja ti bisi tersebar di dunya IT. Anang tak temu nganu orang, oh Jane, laban orang nemu nyaut!

Nya meh ulah orang ti seredah/tambab/dadak ... mua enda nemu malu!

Christmas Bokeh

2011-12-10T15:55:00.000-08:00

Lima belas hari agi alu ngintu Krismas kitai! Aku baru sahari tu nganjung gambar dituchi ngambika bisi dikena ngaga kad Krismas! Laun, ku Doug! Iya ga tukang gambar bisi mogok mimit!

Tu siti ari gambar diambi aku sahari tu kena ngaga kad Krismas.

Aku sigi rindu bemain enggau camera. Tu gamal heart bokeh ari bintang atas kayu Krismas taun tu! Cute, kan?

Ni gambar kayu Krismas ti terang agi deh? Endang sengaja ngambi gambar enda terang laban ti ka meda heart bokeh!

Tu Santa's sleigh ti digantung ba jendela. Gagit amat bala anak ngantung Santa's sleigh enggau angels dua iku ba jendela. Nadai pesen bukai, endang baka taun ke udah!

Ila bekunsi ke gambar bukai, au!

Cherita Pun Bulan Dua Belas

2011-12-05T21:14:00.000-08:00

Hari beganti minggu, minggu beganti bulan, bulan beganti taun. Nyau enda berasai, meda nyau udah bulan dua belas, taun pen nyau ka abis!

Musim gugur

Hari ba menua kami ditu udah mupuk chelap taja agi musim gugur. Aku enda sedar penyelap hari demalam, tekenyit pagi tadi meda rumput burak laban embun meku. Nadai penyadi meh kantuk entekai - mati magang laban penyelap hari. Sahari tu aku sempat ngumpul entekai puda, ambi ke lauk.

Makai ais krim mochi

Hari enam tu kemari aku ngintu hari pengada. Lembau nyebut penyampau umur ... enti gawa for Malaysia, berapa taun aja agi tinggal udah tau penchen! Kami menyanak nganjung diri makai lemai ba restoran Jepun enda jauh ari rumah kami. Bala anak nemu endar madah ngagai tokey neo kami ngintu hari pengada aku. Udah kami tembu makai, mupuk kami ... berapa singkang aja ba luar restoran ninga tokey neo ngangau, ngasuh kami tama makai ais krim mochi! Lapa deh, nadai ka muai peluang, beguai kami menyanak tama baru!

Prujek Ngait

Meda hari nyau mupuk chelap ngerajin ka diri aku begaga ke scarf enggau tupi. Naka iya ke ditemu aku laban ti enda entu nemu iga ngait. Pattern mayuh alai bulih, nyamai ngiga iya ke muntang digaga alu iya ke jampat tembu. Tau dikenyadi sida scarf enggau tupi digaga!

Christmas Mood

Gagit amat bala anak ngias Christmas tree taun tu. Aku mina ngantung api, semua utai bukai digantung bala anak magang. Tau endar saduai dikenyadi taun tu! Kayu Christmas, baka selama ulih kami meli ari Boys Scouts.

Lemai hari enam tu tadi kami menyanak sempat meda Christmas Parade ba menua Galt ditu. Lebuh kami datai ba simpang ti alai kami selalu meda parade, parade pan udah mansa! Nyau meh kami ngipa parade nya nikal ke alai sida berengkah. Nyu nadai orang agi meda ba pengujung parade. Hari chelap amat lemai nya, bala orang mayuh udah ngipa tumu maya sida baru berengkah. Enda ga lebu nganti, puas ati bala anak lemai nya.

Bah naka tu aja sekali tu! Arapka tulang enda malas update blog tu ila!

Quince

2011-11-05T15:11:00.000-07:00

Ok, udah agi cherita buak entekai! Agi mayuh buah entekai aku dia tang sekali tu aku ka bekunsi cherita pasal buah quince. Gamal buah tu baka pear enggau epul, tang isi iya kering agi ari buah dua igi nya. Bau iya manah amat, nyu ka bau epul. Quince enggai nyadi di empa baka nya aja laban enda entu nyamai tambah mega kering. Bisi hari tingkil ngeli batu!

Sepun tu aja pun quince ke bisi ditanam kami. Taja enda entu diintu, ninting taun iya bebuah. Ulat enda ga ngachau iya. Taun tu bekareh aku ngiga resipi laban sayau amat meda buah tebasau ngapa. Taun ke udah endang diteju buruk dia meh buah quince aku nya.

Buah quince enti udah dipanduk tau bebali curak iya. Curak iya ke bendar burak baka buah pear. Peda pemanah gamal buah nya udah iya dipanduk. Ditu aku ngaga quince paste - baka jam tang tebal sereta rangkai agi ari jam asai iya. Nyamai di empa enggau cheese tauka di empa enggau ruti. Asai iya manis enggau masam laban bisi digulai enggau lemon maya ke manduk iya.

Udah ke ngaga paste aku alu nguji ngaga jam. Buah quince diparut udah nya dipanduk enggau ai, gula enggau ai lemon. Panduk datai ke gamal iya baka jam, enti kelalu rangkai pedis ga iya disapu atas ruti paun! Amat nyamai endar jam buah quince!

Sekeda ke udah dipanduk aku kutai digaga aku ke tarte, baka pie. Baru iya meh aku tu nguji ngaga utai baka tu! Kulit pie nya ngena ke endang udah digaga - meli ari supermarket. Pama endar ga penaymai tarte tu!

Digaga ke crumble ga nyamai agi sepi aku! Buah quince ke udah dipanduk nya enggau ti udah di sirap dikena ngaga crumble. Kebuah iya nyamai agi laban utai ke ditabur atas buah quince nya walnut, oats, gula, tepung cinnamon enggau tepung. Mmmmmmm!

Mmmmmmm! Ka endar Doug nyebut nya nyamai amat lebuh ke makai crumble nya tadi! Baru taun tu meh aku belajar ngaga crumble. Enda pedis ngaga tu nya ti ngasuh gagit amat. Crumble ba gambar tu baru ke dua kali aku ngaga iya. Google aja recipe crumble ... muntang. Nadai buah quince, pear, epul enggau buah bukai tau magang dikena ngaga crumble.

Anang nitik liur meda gambar dibantai aku sekali tu, au!

Cherita Makai Entekai

2011-10-04T13:43:00.000-07:00

Sebedau Doug jadi enggau aku, iya mina nemu makai pie entekai (pumpkin pie). Ku iya, indai iya enda kala manduk entekai ke lauk. Nya meh ku iya, enti nemu entekai ngenyamai nya diempa ke lauk, lapa enggai manduk entekai ke lauk kelia!

Tu gamal entekai panggang - di isi enggau asi ti udah digulai enggau manuk pepat, enggau utai bukai ti ngasuh iya nyamai alu di panggang. Munyi ku pangan aku siku, isi entekai dikaus enggau sudu alu diempa enggau asi ti endang udah dalam buah nya tadi.

Ukai main ga pengering kulit entekai! Nyu ngena geraji letrik nyayat entekai tu! Nya ti bisi dipeda menyana gamal bekau entekai ditetak. Enti ngena duku nadai jalai ngalus nya gamal entekai ditetak!

Ngelama tu aku enda nemu entekai puda tau dipanduk ke lauk. Semadi dipadah pangan aku siku - amat nyamai endar ga entekai puda! Manis endar isi iya. Ba gambar tu, entekai puda digulai aku enggau kuntum morning glory. Nyamai amat!

Entekai puda digulai enggau kantuk iya enda ibuh disebut. Endang gerenti nyamai! Nya pangan aku siku da madah buah entekai tu baka buah nangka. Tau diempa puda, tengan mansau enggau udah mansau. Enti udah munyi nya, enda meh aku kiruh nganti iya mansau iga enti ka digaga ke lauk!

Amat enda lebu bekebun entekai taun tu!

Tomato & Entekai

2011-09-22T19:43:00.000-07:00

Amat enda alah empa pemayuh tomato kami taun tu! Bansa ke ba gambar aku tu enda ngemayuh bansa iya ke panjai. Enti iya segala baka tu nyamai amat dikena ngaga lauk di isi sida manuk pepat tauka sebarang dagin bukai. Kami duai Doug mina makai tomato berisi ke dagin manuk kulok tu demalam. Enda ibuh makai asi laban tu aja udah kenyang perut!

Lemai tu makai sardin ikan alu di gulai enggau tomato mega. Nadai lauk bukai kami duai Doug lemai tu - ikan sardin gulai tomato enggau lauk entekai. Ituk endar aku nyebut pemanis entekai aku nya. Amat enda lebu mai leka ari Miri taun nyin kemari!

Enti tulang rajin, ukai nya nadai resipi ti beguna ke tomato! Tang nya meh tulang ke buruk!

Entekai

2011-09-21T11:51:00.001-07:00

Galak amat entekai di tanam kami taun tu! Agi mayuh iya ke benung mansau ba randau pun entekai ba kebun kami dia.

Amat enda alah empa meh pemayuh entekai kami tu ila! Nya meh aku begiga ka resipi kena ngabis ke entekai. Ukai enda gaga agi ati meda kuih bingka entekai nyadi kemari! Belauk ke entekai enda ibuh disebut - nyu beturut hari ke makai lauk entekai! Kami duai Doug sama rindu makai entekai, apa agi entekai nya manis amat. Iya ke manis nya endang ari leka dibai ari menua.

Ku Doug, sebedau iya jadi ke aku endang amat enda kala makai lauk entekai. Mina entekai ba pumpkin pie enggau pumpkin soup aja! Ukai main agi iya besebut ke penyamai lauk entekai ke dipanduk aku!

Au meh, belauk entekai belama meh kitai seagi entekai nya bisi!

Pengawa Hari Enam

2011-09-13T16:32:00.000-07:00

Maya bala nembiak kemisi musim panas tu tadi, suah endar aku nyebut ka mai bala bejalai ba Consumnes River Preserve. Tang alu ga enda! Nya meh hari enam tu kemari aku mai bala bejalai kin. Hari manah amat ga lemai nya, enda entu angat alu bisi endar asai angin muput.

Sida burung bangau, sida itit endang semampai bisi dia. Musim gugur tu lagi baru meda sida ansa enggau itit rami agi dia. Iya ke dianti aku ninting taun iya nya burung Sandhill Cranes. Rindu amat aku meda burung tu!

Umbas iya ga pengelama kami dia, kiraka mupuk petang hari kami ti pulai ari nya. Kapa agi ngira berapi udah kitai ti pulai bejalai! Nyau kami menyanak nganjung diri makai ba restoran Cina. Dulu aku telipun ngasuh sida nyendia manuk guring ke aku! Enti ngudar lauk nya maya ke udah din, lubah endar lauk nya datai laban ukai nya jampat nguring manuk!

Au, nya meh pengawa kami menyanak hari enam tu tadi!

Gred Tiga

2011-09-06T15:11:00.000-07:00

Sahari tu hari keterubah Denice saduai Duncan niki ngagai Gred tiga. Lama endar saduai udah nganti hari tu! Gagit amat orang ka nurun sekula! Aku pan gagit saduai berengkah sekula sahari tu. Lebih tiga bulan saduai kemisi musim panas. Lelak rah rah belara ke saduai!

Tengah hari tu tadi, baka taun ke udah, aku nulung ngemata bala nembiak maya sida bemain udah ke makai tengah hari. Sekula nya sigi enda besai, nya meh aku berati ke mua nembaik ke baru ngambika ulih ngingat gamal sida. Taun dulu, enda aku tingat ke nama semua nembiak dia, nya meh taun tu aku deka nguji ngingat semua nama sida.

Enda meh aku ulih bejaga jauh malam agi enggai ke pedis dani pagi siti. Demalam puas aku ninduk ke diri - kelalu tumu, enggai mata dibai tinduk tumu! Enti enda chukup tinduk, mood ga enda manah, alu ga nganu orang!

Arap ke taun tu, taun ti mai berkat ke saduai. Amen!

Tomato Chutney

2011-09-05T18:23:00.000-07:00

Tomato Chutney

Mina dua pun tomato ditanam taun tu tang buah iya, akai enda alah diempa! Bendar meh aku ngiga resipi ti beguna ke tomato!

Demalam manduk dagin gulai tomato enggau bawang. Tengah hari tadi belauk ke kubis diguring enggau tomato enggau undang kering. Lemai tu aku nguji resipi ala pemakai India - tomato chutney!

Pagila ka manduk kacang dal enggau tomato, alu ka mega manggang tomato bepuak ke dagin pepat! Enti enda alah ila dijembui tomato, tauka digaga jus! Kapa enda berentak makai tomato!

Asil Kebun

2011-09-04T20:48:00.000-07:00

Gaga amat bala anak meda buah semangka udah mansau alu tau diambi sahari tu! Tiga igi buah semangka ke udah mansau; nya meh Daddy madah ke Denice iya enda tau enda makai buah semangka nya ninting hari! Enggai ke tebasau enti enda diempa!

Sida buah pear enggau epul endang utai tanam lama. Buah pear ke kuning bulat, alu enda mayuh ti tau diempau. Pear ka sebengkah nya baru enda empa ulat. Buah cantaloupe ga sebengkah diempa indu utai ... begedi endar meda nyu buruk magang magang cantaloupe diempa indu utai! Lebu amat nanam iya taun tu!

Sida entimun ditanam enda alah diempa. Nyu diberi Doug ke bala ti enggau iya gawa. Tomato galak nya ga, nyu rebah dan laban buah ngemayuh nya. Dawai ti kena ngetan pun tomato alu enda enda dibeli maya ke baru nanam iya suba!

Bendar ngabis entekai tu ila! Galak amat! Sepun ari entekai tu bansa ke manis - leka endang dibai aku ari Miri. Enda aku ngadang buah nya besai amat! Besai agi ari buah bul! Aku meda kantuk entekai nyu geram diri ga meda ... ka diulih ke lauk! Berapa kali aku udah ngambi kantuk iya. Meda buah udah mayuh amat, bisi ati aku ngambi siti ke puda, gulai enggau kantuk iya. Nyamai iya ke puda digulai enggau kantuk ku pangan aku siku ti berasal ari Kuching. Enda ibuh dipunsi kulit buah entekai puda nya ku iya.

Ila meh aku nguji!

Brus Gigi

2011-09-02T12:15:00.000-07:00

Naka pengaga Duncan ninga diri menang cabutan brus gigi Sonicare ari klinik gigi alai iya ti nuchi gigi iya minggu nyin kemari. Tiap bulan klinik tu bisi meri siti brus gigi bakatu ngagai nembiak ti bisi ke klinik gigi bulan nya. "It's my lucky day!" ku iya kemari ninga rita nya.

Pagi tu tadi kin meh kami tiga menyanak ngambi brus gigi nya. Begambar indah ba klinik laban bulan tu gambar iya ga digantung ba dinding. Gambar baruh sepiak kiba, gambar Duncan nunjuk nembiak ti menang cabutan bulan tujuh tu kemari.

Manah endar ga Duncan enda takut betemu enggau lutur gigi. Denice, puas ngumbuk baru ka. Tiga kali nganjung diri ngagai klinik gigi (sama klinik alai Duncan), udah nya nikal enda nyadi laban kelalu balat takut. Nyu ngiga klinik bukai, klinik ti teleba agi ngadu gigi bala nembiak ti kelalu balat takut nya baru ka. Alu dia meh alai nganjung iya betemu lutur gigi laban iya kiraka teleba ba klinik nya. Sida ba klinik nya nemu endar ngasuh nembiak enda takut. Nemu amat sida ngadu klinik nya. Bakaka dalam restoran gamal chara sida ngerias klinik nya. Ni enda bala nembiak ti takut nyu nemu rilek mimit ga meda tempat nya enda tak baka klinik gigi. Manah amat ga bisi utai baka tu ba menua ditu.

Au, naka tu aja cherita pasal brus gigi enggau klinik gigi sekali tu!

Nadai Karan

2011-08-31T16:13:00.001-07:00

Tumu pagi tadi bala anak ngetuk pintu alu nanya, "What can we do?" Orang buhing meh nya laban enda ulih meda tv laban ti nadai karan. Sepemanjai kemisi musim panas saduai endang masau jam meda tv enggau bemain komputa besahari sahari.

Tiang karan ba pun jalai benung diganti nya kebuah karan ngagai rumah kami enggau rumah orang berimbai kami nadai sahari tu. Ari pukul 8.00 pagi tadi udah nadai karan ... kenu pukul 4.00 lemai baru besambung baru, tang udah pukul 4.00 jam diatu alu ga bedau.

Radio agi ga ulih didinga laban ti tau ngena bateri bemain radio. Komputa aku ulih ga bejalai laban bisi tablet pc ti tan amat bateri, alu modem ngena ari hand phone. Nya pan nyu abis bateri ba hand phone ... baru ga 2 jam ngena! Amat enda berapa! Nyau meh nganjung ngagai kerita ngambika ulih ngechas .. ninjik ga maya ti ngechas modem nya ulih bejalai, ulih ga be-internet!

Ninjik ga hari sahari tu enda entu angat iga, agi ulih ditat taja kipas enda bepusin, air-cond enda bejalai. Enti nya angat agi ari nya ... apu, sigi mindah aku, nadai aku ka ngenat hari angat ba rumah!

BBQ alai manduk ai, manduk telu, maggie mee enggau ngangat asi sahari tu laban dapur kami dapur karan. Nya ga siti penyamai ngembuan utai baka tu! Enda ibuh kiruh nganjung diri makai ba restoran laban dapur ti nadai karan!

Bah, nya iya karan baru bisi! Alu beguai bala anak masang tv enggau masang komputa!

Skirt

2011-08-29T19:43:00.000-07:00

Puas endar asai ati aku meda skirt ke digaga aku ke Denice menyana amat gamal! Aku amat enda kala ngaga gari ke anak aku empu. Ngaga panggal, ngaga karung panggal, ngaga pua tampung ... nya aja meh utai ti dijait aku ke anak aku! Baju gaun diri empu endang kala aku ngaga tang kada bisi meniga taun aku nadai nyait gari diri empu.

Ba sekula bala anak pemanjai pakaian bala nembiak indu enggai enda baruh ari pala patung. Enda ngawa nya panjai, tang penyalah iya kedai ti nadai nyual pakaian sekula ke panjai! Abis alai ngiga, nadai tetemu! Ba internet mina saiz nembiak ke tuai agi bisi skirt panjai tang saiz bala sida Denice nadai bulih. Dua iti uniform (jumpers) baru udah dibeli aku, nyu meli saiz jauh besai agi ari tubuh iya laban ti ka ngulih ke pemanjai! Nyu enggai enda di adu ga iya ke baru dibeli nya. Ni alah tudah Denice nyu rigang rigang ngena baju sekula nya ila!

Amat enda puas endar ati aku laban tu. Endang ari taun dulu aku udah gut gut laban kedai ti di recommend sekula alai meli uniform nadai nyual uniform panjai. Taun ke udah, ka pan enda ngena uniform naka pala patung tudah Denice. Ninjik ga sekula enda terit meresa pemanjai skirt bala nembiak indu taun tu tadi!

Nya kebuah hari lima tu kemari aku bisi meli kain kena ngaga skirt ke Denice. Ukai nya pedis enti amat udah ga ngaga, ku aku bejaku kediri! Aku endang udah berati ke stail sekeda skirt sekula ba kedai. Ngiga stail ke nyamai agi digaga meh aku tu tadi. Ninjik mega Denice bisi siti skirt ti tau alai aku nunda saiz.

Nah, diatu kiraka udah nemu ngaga skirt uniform, kapa kiruh meli saiz besai agi ari tubuh anak dudi ila! Murah sereta ngam uniform gaga diri empu!

Ikan Emas

2011-08-28T20:04:00.000-07:00

Tu meh penyadi ikan emas ti melepung dalam tangki ikan pagi tadi. Mina dua iku agi tinggal dalam tangki nya. Sigi nadai mayuh ikan emas ti ditupi, alu iya ke mati sahari tu iya ke besai sekali.

Sinu meh bala anak meda siku ari ikan tupi saduai udah mati. Nya meh Daddy alu ngasuh saduai numbak lubang alai ngubur ikan nya tadi. Mabu endar lubang ke ditumbak, ba tanah ngimbai mua pintu rumah kami.

Dibungkus enggau tisu tudah ikan, udah nya disimpan dalam lubang. Batu kena saduai ngelai alai ikan nya dikubur. Enggai enda dianjung enggau sembiang ga ikan nya tadi!

Menyana meh ikan nya dianjung ngagai serega ikan di langit din!

Hurricane Irene

2011-08-26T21:56:00.000-07:00

Munyi ku kaban kitai, alhamdulillah, kami ke diau di sepiak kiba/tebing barat benua Amerika nadai enggau orang begau tegal Hurricane Irene. Seleka ujan deh nadai udah nyepi kami. Semina pun bulan enam kutai ti bisi ujan mimit tang sida ke diau tunga menua bebukit ba California bisi ga nyepi ujan maya musim panas tu. Munyi ku aku tadi, ba endur bukai seleka ujan nadai meh udah turun.

Berita ba TV, nadai cherita bukai, cherita Irene aja. Baka ke enda kala kena pangka kabut besai! Sekeda mensia sigi enda ninga ke jaku pesan perintah .. tinggal tebing tasik .. giga alai ti selamat agi! Agi meh bala enggai mindah. Enti amat kena pangka hurricane tebing tasik ti alai mensia ti enggai mindah, nadai nganjung diri nyelemat kita, ku perintah. Kapa deh.

Semua flight ngagai tempat ti diadang kena pansa Irene dikinsil bepun ari pagi hari enam datai ke hari satu minggu baru. Ba New York city, train baruh tanah pan kinsil. Besedia meh sida - takut karan nadai, takut bah, takut tiang karan tumbang, pun kayu tumbang, rumah orang tekebu ...

Tu meh cherita semadi nadai aku sekali tu!

Musim Panas

2011-08-25T20:17:00.000-07:00

Enti dibanding enggau taun ke udah, musim panas taun tu, kelebih agi ba menua alai aku diau, enda ngangat taun ke udah. Sepemanjai bulan lapan tu pengangat hari ba kami ditu nadai udah manggai 38 °C. Enti nitih musim panas ke udah bulan lapan endang bisi enda kurang ari 5 hari beturut turut pengangat hari lebih ari 38 °C.

Dalam bulan tujuh nyin kemari bisi berapa hari aja pengangat hari lebih ari 38 °C. Nya meh ti ngasuh aku rindu amat meda hari ba kami ditu enda ngangat taun ke udah. Ma lemai hari, bisi endar alai nganjung diri duduk ba luar rilek baruh pun kayu tauka baruh payung.

Tang sida geng ke diau di Houston, Texas, lain ga hari. Benung kemarau sida din .. lebih 40 hari beturut turut pengangat hari lebih ari 40 °C! Amat parai diau ba menua Texas enti nadai air-cond! Mina lemai kemari enggau pagi tu bala bisi madah bisi ujan labuh ba Houston. Kada enda tempias ujan dibai Hurricane Irene? Sinu ninga bala sebana ke kebun bunga abis layu gasak hari kelalu angat.

Kami ke diau ba Sacramento Valley di California ditu endang beterima kasih hari enda ngangat taun ke udah! Selalu endar angin tasik bisi muput alu datai ba kami ditu, nya ti ngasuh hari kami ditu enda angat. Tang ba alai bukai ti jauh ari tasik, sigi angat pan din.

Bulan tujuh tu kemari, kami menyanak bisi nemuai ke San Francisco laban ti bisi enggau orang begempuru ke Bersih 2.0! Anang enda enggau orang ngeruh ai! Laban San Francisco ti ngimbai tasik asaika ukai musim panas menua nya dia. Nyu bejaket jaket bala kami ti begempuru enda jauh ari Golden Gate Bridge! Chelap!

Bah, naka tu aja cherita ti ulih dikunsi enggau kita sekali tu!

Lauk Iban

2011-08-24T15:01:00.000-07:00

Tu ukai keterubah iya aku bisi bekunsi cherita pemakai kitai Iban ba blog aku tu. Nya meh bisi sekali siku ti bisi macha blog aku ninggal komen madah diri rindu nguji pemakai ba menua alai iya nemuai. Reti nya tadi iya madah kapa kiruh ngiga lauk kitai Iban, empa aja pemakai orang ditu!

Aku endang rindu pan nguji pemakai bansa orang bukai, pemakai menua ti alai aku melancung! Ni iya dia ka diuji aku magang asal utai di-idang nya ukai dagin ukui tauka dagin ular tauka sida indu utai guring! Eeek, agi ngelisi aku meda sida buntak guring dijual bakaka nyual kacang kuda agi angat di menua Cambodia!

Ba dapur/rumah diri empu nadai meh aku tan makai pemakai bansa ribai ninting hari! Kitai ga endang Iban, tuai diri makai pemakai Iban tauka pemakai Malaysia, enggai nyadi nyawa mina dibai makai menua orang ti alai kitai diau! Ngumba kitai ku bala bakih dimenua!

Nya meh bekareh ngiga sida kantuk entekai, kantuk peria, petai, tubu, enchalu, kasam janik ... ukai madah pemakai orang ditu enda nyamai ... nyawa ti udah telaba makai pemakai asal kitai!

Ninjik endar ga ba menua California sida sayur ti dikerindu kitai mayuh bisi dijual ditu! Mina sida sayur babas baka sida rambai, sida miding ti nadai. Tang ba menua ti bisi ujan lebat baka di Washington state, di Oregon, di Florida endang bisi tumbuh sida rambai, sida miding. Nemu ga bala ribai makai mina chara sida manduk aja lain ari enggi kitai.

Orang ti enggau aku begulai ninjik ga enda milih, barang lauk di-idang endang diempa magang. Nya meh iya madah kasam janik (kasam gaga aku bulan satu nyin kemari) diguring enggau tubu apin lama tu tadi nyamai amat. Enti udah munyi nya ngaga kasam baru meh aku tu ila! Mina bala anak aja ti bisi milih laban ti enda entu ka makai dagin tauka sayur. Arapka udah sida besai agi ila, enda entu milih agi. Iya ke indu udah nemu makai sida sayur kai lan enggau bok choy. Iya ke laki nya agi milih.

Bah, nyu lapar diri asai nyawa bai nyerita pasal pemakai! Sup kasam janik gulai enggau entimun betu ... *meliur*

Avila & Port San Luis

2011-08-23T18:16:00.000-07:00

Maya kami menyanak ti bisi nemuai ke Los Osos pun bulan tu tadi, kami bisi limpang ke Avila enggau Port San Luis. Tempat dua iti tu enda jauh ari Los Osos, mina kami ti lama nadai bejalai kin. Enti bala anak nemu dia bisi pantai, tentu saduai kiak kiak minta bai kin!

Pantai ba Avila enda entu besai iga enti dibanding enggau iya ke ba Pismo Beach. Maya kami ke Avila enggau Port San Luis hari pan udah lemai. Ka ngambar mata panas padam kenu, tang ni nya mata panas bisi dipeda! Lindung bukit!

Taja pia, rindu ga meda burung tasik, meda bot ke ba ai, enggau meda menua dia. Amat lama endar kami nadai kia. Selalu endar ga simpang nuju tempat tu dipansa ma nemuai ngagai sida entua aku, tang aku ti nadai bisi ati kin laban agi ingat menua nya mit!

Bisi orang mela ikan ba jeti tu peda aku. Alai mela ikan endang bisi disedia dia ni enda nyamai ma datai dia udah ke berikan. Engka sida tu raban orang ti baru pulai berikan. Berebut bala burung tasik nganti sida perut ikan, iku ikan dipalung orang ke tasik!

Ngena endar ga ba Port San Luis agi meruan restoran pemakai tasik dikumbai Fat Cat. Enda besai restoran nya tang kiraka rami ga orang makai dia lemai nya. Udah kami ti bejalai sebelah jeti enggau berati ke bot ti bisi dia, kami alu nganjung diri makai. Siti aja lah, pemakai tasik orang ditu enda baka pemakai tasik kitai di menua Malaysia din! Alah chara sida ribai manduk pemakai tasik ari kitai dimenua din! Engka nyawa udah tuai tu milih amat kini!

Rindu endar ga aku meda bulan enggau kelemayang iya atas ai lebuhka pansut ari restoran! Ninjik ga bisi mai tripod! Puas ga ati taja enda tepeda ke mata panas padam lemai nya!

Udah kami pulai ari Port San Luis, kami alu ngetu ba Avila. Nyu sunyi pasar Avila laban jam udah lalu pukul 9.00 malam maya kami ke datai dia. Lemai nya hari bisi chelap mimit tang bala anak kiak kiak minta beli ais krim. Nadai irau ke hari chelap pan saduai ma udah ka makai ais krim!

Dudi ila ma kami bisi nemuai ke Los Osos, tau limpang ke Avila enggau Port San Luis baru!

Bunga Morning Glory

2011-08-22T12:27:00.000-07:00

Aku enda nemu nama bunga morning glory dalam jaku Iban tauka dalam jaku Melayu. Taun tu taun ke tiga tauka taun ke empat aku udah nanam bunga morning glory tu. Taun nyin kemari, tulang malas amat, alu diteju layu sebelah pagar enggau bunga bukai alai iya bebelit. Nya meh ngemayuh leka tuai labuh ke tanah! Nyu dichabut sekeda ke tumbuh taun tu laban ti enggai meda kelalu mayuh. Datai ke diatu agi meh iya baru nyumbuk pansut ari tanah!!

Ma udah musim chelap mati magang pun morning glory. Iya ke layu nya ke enggai nyadi enda diberesi ari sida pagar enggau bunga bukai. Jai amat gamal ma udah layu.

Sapa bala kita nemu kumtum morning glory tu tau diempa? Aku baru diatu ke nemu! Nya pan semadi pangan siku ti berasal ari Kuching ti madah. "Panduk iya baka kitai ke manduk sayur," ku iya. "Panduk enggau belacan tau, enggau bawang putih enggau oyster sauce tau, gulai enggau utai bukai tau," ku iya. "Semadi enggi nuan nya mayuh uji panduk," ku iya madah ke aku!

Nya meh aku alu nguji. Tiga kali aku udah manduk kuntum morning glory tu! Amat nyamai bunga tu! Iya ke keterubah, guring aku enggau pusu enggau belachan. Bisi asai terung pipit manis sepi aku. Kedua kali digulai aku chabi gadung enggau sida belachan mega. Alu iya ketiga kali di gulai aku enggau kantuk entekai. Akai, nyamai amat, enda milih kati nuan manduk iya!

Enti kita bisi tetemuka kuntum morning glory, anang enda nguji! Leka tuai morning glory anang makai, tau mabuk laban iya!

Au, naka tu aja cherita aku sekali tu!

Cherita Ular

2011-08-21T14:42:00.000-07:00

Sapa enda kala ninga pasal ular rattle snake? Bisa pantuk ular tu! Nya meh nyu geli diri aku lebuhka ninga entua indu aku madah iya bisi meda ular tu ngerayap lari ba mua barn kami di Los Osos din. Maya kami ke nemuai ke Los Osos bulan enam nyin kemari, dulu meh aku ngasuh Doug meresa sebelah babas mua barn. Nadai aku ka pansut ari kerita! Tang sekumbang kami ke din maya nya suba nadai meda rattle snake nya ga kami. "Engka salah ular peda indai aku", ku Doug.

Ujung minggu tu kemari bisi nemuai ke Los Osos baru kami. Agi aku ingat ke cherita ular entua aku! Pagi siti, Doug rauh rauh ngasuh Duncan ngambi pistol iya. "Bisi rattle snake ba mua kelebat belakang ditu", ku iya nyerauh. "Bai kamera nuan!" ngasuh aku turun ngambar iya!

Aieee, nyeregu diri bulu aku meda ular nya begulung ba mua kelebat ba panas! Kapa aku nganjung diri semak ngambar ular nya! Enda besai ular nya, tang ngenang ke ular nya ular bisa ..... eeeekk! "Gambar aku nimbak ular nya," ku Doug ga!

Enda tak alu mati ga ular ditimbak iya nya. Agi ngeliat, agi tau engkebut. Tang nadai jalai iya ulih mantuk. Tulang iya udah patah kena timbak. Udah iya mati amat, nyau meh Doug ngeliti kulit ular nya. Iya sigi landik ngeliti kulit ular laban sekali suba iya kala nimbak rattle snake ti bisi mantuk ukui iya. Nyeh .. nya meh pengujung ular nya tadi!

Bala pangan ba Facebook ngumba endar ga, ngasuh aku manduk dagin ular nya! Peeeiii, kapa aku! Guring, ku siku. Panduk kacang ma, ku siku ga. Panduk enggau lia enggau arak! Kapa aku!! Diberi kami ngagai pangan Doug dagin ular nya. Iya ka manduk ku pangan iya.

Malam nya bisi bejalai ngagai sida entua aku kami menyanak. Nama utai dibai pulai ari nyin? Container siti ti ngundan ular rattle snake!! Nya enggi menyadi Doug - ular ke diberi pangan iya, ular ti mati kena langgar. Ninga kami menyanak bisi ka nemuai ke Los Osos, beguai iya nganjung ular iya nya ngagai rumah indai iya. Menyadi Doug ngasuh iya ngeliti kulit ular nya ke iya! Akai, dua malam ular nya disimpan dalam peti ais. Dulu aku ngasuh Doug nyimpan container nya dalam beg plastik. Sapa kitai ka tekenyit meda ular tiap kali kitai ngebak peti ais?!

Nyau limpang dulu ga Doug ngeliti ke kulit ular tu sebedau kami ninggal ke Los Osos hari satu tu kemari. Aku ti enda nyangka Denice nya enda takut! Dia meh iya ngemata daddy ngeliti ke kulit ular. Udah ular nya dikeliti dulu iya nyengkau megai kulit nya! Eeechak!

Udah nya alu di pin Doug ba papan siti kulit nya, ngambika ulih rangkai alu di tinggal di Los Osos din. Tinggi alai iya manggai papan nya enggaika dikereja sida chit ti mayuh amat ba barn nya maya kami nadai dia. Enggi iya dibai iya pulai, tang siti ga ulah Doug nya. Tak dipanggai iya atas beg enggau perengka kami ba belakang kerita. Nyerauh tekenyit aku lebuh ngebak pintu but kerita meda kulit ular!

Au, naka tu aja cherita ular aku sekali tu! Arapka kita teperindang!

Camping 2011

2011-08-20T22:02:00.000-07:00

Maya musim panas taun tu, kami menyanak bisi niri ke kemah ba belakang rumah ... camping kenu! Ku kawan aku siku, nya camping "city slickers style" - stail orang ba nengri, ku iya!

Kati ku enda munyi nya? Dia kitai ka nganjung diri ke jamban, pulai ga kitai tama ke rumah. Karan bisi ga disambung ke dalam kemah nya. Bisi lah alai bala anak meda tv! Api elektrik bisi ga dalam kemah nya. Siang hari pulai ga ke rumah laban angat enti diau ba kemah nya!

Doug mina 2 malam aja enggau kami tinduk dia, laban ti ka ngiga alai nyamai agi alai tinduk maya hari ti gawa. Malam keterubah irau mimit aku ninga angin, enggaika tekebu kemah! Doug madah diri bemimpi kami ngetan ke kemah laban angin kelalu bangat! Nyu bemimpi iya ke ninga angin! Akai, enda jenak aku tinduk dalam kemah malam nya! Malam siti baru aku jenak laban ti udah lelak bekau ti enda entu tinduk malam ke dulu!

Aku mina sanggup tinduk empat malam aja dalam kemah nya. Enda tan agi belakang aku bai tinduk atas tilam berisi ke angin! Iya ga tilam nya enda rata ... enda aku nemu madah ke gamal tilam nya!

Bala anak ka meh tinduk kediri dalam kemah nya tang aku ke enda berani ngasuh saduai bemalam kediri ba luar! Ni alah ditaban orang saduai, ku aku!

Seminggu kemah nya diteju ba belakang rumah. Diatu udah meh iya disimpan. Agi bisi hari bekemah enti agi ka laban hari ba California lubah chelap ari tempat bukai. Bala nembiak berengkah sekula kena 6 hb sembilan tu ila. Meda baka ila!

Mai kitai ngayau

2011-05-26T17:17:00.001-07:00

Laut siku tu ka mai kitai ngayau! Kati kitai enda ngaga jaku munyi nya? Berani iya ku iya? Enti berani, ayan ke mua ngambika kitai nemu sapa iya!

Au, bangsat meh kitai Christian, ku iya. Mina sida iya aja tau megai perintah.

Beli meh kitai Christian di Borneo. Au, sumpah dia meh Tuhan kitai. Kitai enda baka sida iya, mina temu mengamuk enda tentu pasal enti tuhan sida, bup sida di gaga baka nya!

Enda liat neh, ppppppptttuuui!

Kite Day

2011-04-15T09:51:00.000-07:00

Hari minggu nyin kemari, kami menyanak bisi nganjung diri main gudi ba MacFarland Ranch. Pengawa tu diatur ninting taun tang kami menyanak ka endar enda ingat ke maya orang ti ngatur pengawa nya. Taun tu baru kedua kali kami bisi enggau orang.

Gaga amat bala anak ninga pasal Kite Day. Begau meh saduai ngangkut gudi saduai alu nyimpan ke dalam kerita lebuh kami ti nyendia diri nurun ke gereja. Pengawa nya berengkah pukul 10 a.m. tang kami mina ulih ke MacFarland Ranch pukul 1.00 p.m. lalu, udah ke pulai sembiang.

Gudi bilun ti dimain Denice tu ulih kami mutik ari tengah jalai. Nyu ka kena lantak kami da laban jalai ti ditengah petang amat malam nya. Nama utai ba tengah jalai nyin, ku kami duai Doug. Paduhal gudi! Nasit ga nadai orang dulu agi ari kami ti bisi mansa jalai nya. Beguai meh aku ngumpul! Tak agi menyana endar gudi orang nya!

Rindu amat aku meda bala nembiak bemain gudi sahari tu. Orang ke ngatur pengawa nya endang bisi nyendia gudi ti tau dijali enti orang nadai mai gudi diri empu. Pia mega sida dia bisi ga ngaga gudi mit ke baranagsapa ti beguna ke iya.

Duncan enggai pulai pulai - agi belala! Tang sahari nya angin kekadang muput, kekadang ngetu. Nya meh ti ngasuh pedis. Enda lama gudi terbai manah ba langit, udah nya turun ga baru ke tanah! Minggu dulu agi ari nya, ukai main agi angin muput! Enda ngawa laban puas ga ati bala anak bemain gudi sahari nya.

Radio Free Sarawak

2011-04-01T21:13:00.000-07:00

Lelengau amat asai ati ninga nyawa Peter John Jaban ba Radio Free Sarawak. Barangsapa kita ti enda kala ninga pasal radio program tu, abas meh dia.

Tang enti kita penyukung BN, penyukung Taib Mahmud, tentu ringat kita ninga radio program ti ditabur Peter John! Kati kita enda, cherita rasuah, cherita tanah NCR kena rampas, cherita pengaya sida Taib sebilik enggau kroni iya, cherita meli undi - semua cherita tu dibantai magang ba program Radio Free Sarawak.

Aku ketawa diri macha pasal perintah ti ka nyaman Peter John, enggau Clare Brown laban sida ti nabur program ari stisin radio ti enda belisin. Kati enda ketawa? Ukai radio stisin tu nabur program sida ari Sarawak tauka di Malaysia! Radio program tu ditabur ari London! Sema aku nabur program radio aku ti tau didinga kita di Sarawak, beguna ke lisin radio aku tu?!

Sinu amat aku macha pasal bini anak Peter John ti ditinggal di Sarawak. Tegal Peter John ti berani mantaika bantah enggau mantai cherita ti dikelalai orang ke megai perintah, business ti dipejalai bini anak iya nyadi "mangsa". Tambah mega se-agi Taib Mahmud megai perintah di Sarawak nadai meh tudah Peter John tau pulai ke Sarawak agi. Dulu meh sida polis nganti penatai iya alai sida tau ngetan iya!

Tang kitai orang Sarawak, kelebih agi kitai ti bansa bumiputera menua Sarawak, anang pelik pelik mata meda tanah kitai abis dirampas orang.

Sapa kitai tu? Mina peturun Apai Salui? Ti tau dikemeli orang? Badu agi kitai dikemeli orang! Kapa kitai nyukung orang ti mina ngira ngisi periuk diri empu enggau ti mina gila pangkat? Anang ninga jaku orang ti madah mina BN aja ti ulih meri pemansang ngagai kita! Berapa lama udah semaya tu dinga kita?

Peda menua Selangor enggau Penang. Negri dua iti tu tau nyadi chunto menua Sarawak. Ukai semina BN aja ti tau mai pemansang!

Tukar orang ti megai perintah menua Sarawak! Badu agi kitai neju sida ngerampas pengaya menua Sarawak! Diatu meh peluang iya! Enti ukai diatu, kemaya agi?

Science Faire 2011

2011-03-18T16:02:00.001-07:00

Demalam sekula bala anak bisi ngatur Science Faire. Taun tu keterubah iya saduai enggau orang ba Science Faire laban pengawa tu diatur dua taun sekali.

Nama saduai aja lekat ba prujik saduai - iya ke bendar idea enggau orang ti ngereja pengawa nya Daddy! Tang ukai saduai siku ti bakanya, tebal agi bala nembiak endang apai indai ti nulung ngaga prujik. Dini bala sida ti agi mit nemu utai pasal science iga! Nulis sereta ngupy utai ti udah ditulis apai sida aja meh sida ke mit agi.

Denice enggau Duncan bekunsi ke siti prujik. Daddy saduai endang udah dulu mandang ke experiment ti dikena saduai ba Science Faire nya. Maya kami nerima berita pasal tiap iku nembiak enda tau enda nganjung siti prujik ngagai Science Faire tu, dia aku alu ngasuh saduai ngena experiment ke udah dipandang Daddy. Kebuah iya saduai endang udah nemu pasal experiment nya, tambah mega nemu ga nerang pasal experiment nya enti orang nanya.

Nama deh, bulih First Prize ke sida dalam Gred 2 prujik saduai. Amat geli ati aku ngenang! Rindu ga aku meda prujik bala nembiak bukai. Orang ke udah kala enggau Science Faire nemu meh nyendia prujik ... gambar, display board orang bekaler kaler ... taun bukai ila meh ngaga prujik ti lebih agi "menarik"! Kiraka udah pama bisi bulih First Prize!

Musim Bunga

2011-03-02T16:51:00.001-08:00

Enti nitih kalender diatu agi benung musim chelap. Salji agi turun ba sekeda tempat tang ba menua ti nadai salji turun endang udah mupuk bebunga sida pun kayu kelebih agi sida pun buah. Pun buah ba kebun apai tuai orang seberai kami endang udah bebunga magang. Iya ke apin bebunga laban ke laun dijarau iya, nya kebuah apin bebunga.

Aku endang rindu amat ngambar bunga pun kayu - endang ninting taun aku ngambar pun buah ke bebunga! Sapa kitai enda rindu meda bunga bakatu?

Rumput babas pan galak amat taun tu laban ujan lebat amat taun tu. Galak rumput galak ga iya bebunga! Rindu diri ga aku meda sida bunga rumput. Aku endang enda ngasuh Doug kelalu tumu nginjin rumput laban agi belala meda bunga rumput. Tambah mega enti rumput diinjin sida indu kemindang nadai agi utai ditutu. Kelimpah ari ngambar bunga, aku sigi rindu mega ngambar indu kemindang!

Siti aja utai ti enda kerindu aku laban ujan bangat taun tu. Mayuh alai ai betakung, reti nya mayuh meh nyamuk musim panas tu lagi. Ba menua kami ditu sida nyamuk aedes endang nadai tang bisi sebengkah penyakit ti dibai nyamuk dikumbai West Nile Virus. Virus tu tau munuh mensia, jelu enggau burung. Nya ti dikenangi aku lebuh bala anak bemain ba luar maya musim panas! Endang bejaga belama meh maya musim panas enti udah ba luar!

Bah, nadai tak entu cherita, naka tu aja cherita sekali tu.

Ngaga Ruti Paun

2011-02-28T20:21:00.000-08:00

Bakaka enda arap aku meda diri diatu nemu ngaga ruti paun! Endang lama aku tu ka belajar ngaga ruti paun tang laban ngaga utai tu enggai enda ngena ragi, nya ti nyadi penanggul! Alu enda enda meh aku nguji ngaga laban ti takut utai digaga enda nyadi!

Ruti paun ti keterubah iya digaga aku amat nyu ka enda nyadi! Dua tiga jam kenu nganti ruti nya ngembai dua kali ganda pemesai asal iya. Kebak periuk alai ti ngengkah iya, nama nya tak apin berubah pemesai tunyau ruti nya deh?! Akai, nyu kesal diri ati laban tebasau diri asai jam, alu ngenang ruti paun ti digaga enda nyadi!

Nasib amat dunya diatu dunya IT! Nama kebuah tunyau ruti paun enda niki/kembai? Bisi aja saut ditemu aku ba internet! Pelaba aku laban tunyau butter ti dichampur ke dalam tunyau ragi kelalu angat! Mati tedah ragi laban kelalu angat! Chara ngidup dough nya baru? Tambah tunyau ragi baru ke dalam dough, champur tepung mimit, alu gulung baru meh dough nya. Nehhhhh ... ka niki/kembai dough aku udah 2 jam! Nyadi meh ruti paun cheese aku nya!

Alu gagit meh aku meda ruti paun nya nyadi! Ninting hari meh aku ngiga resipi ba internet, resipi ti enda entu pedis iga digaga. Kiraka nemu meh aku ngaga ruti paun diatu!

Meli mesin ngaga ruti paun, ku sekeda pangan aku. Muntang! Muntang amat muntang tang enda meh asai kitai ti ngaga utai ngena jari diri empu! Ati pan puas laban nemu semua nya kereja jari diri empu!

Nemuai ke Arizona

2011-02-24T17:01:00.000-08:00

Pun bulan tu tadi kami menyanak bisi nemuai ke Arizona. Sida entua aku mai kerita kin, lalu kami menyanak nepan bilun. Penyauh Phoenix ari Sacramento mina sejam 45 minit. Kebuah kin laban ti ka betemu enggau menyadi entua indu aku ke tuai sekali, alu ngambi video iya nusui maya iya ke gawa dalam kapal perang musim perang dunya ke dua suba. Doug enggai enda ngasuh bala anak betemu enggau uncle iya laban makin enda mayuh agi sida tu ti agi idup.

Lebuh ke ba Arizona, kami sempat ga bejalai meda menua. Siti ari alai ti di gagai kami iya nya Japanese Friendship Garden di Phoenix. Enda entu besai tempat nya tang rindu ga aku ngambar utai ke bisi dia. Bala anak rindang diri meda ikan koi ba pegung dia.

Asa endar ati aku laban ti ka meda cactus bebunga ba Desert Botanical Garden di Phoenix. Apin maya iya bebunga maya kami ka bisi nemuai kin! Arizona tu sigi menua desert ... rangkai, alu mayuh macham cactus ti idup di menua nya. Gambar ke ba atas sekali, nya meh gamal menua Arizona dipeda ari langit. Nadai gadung utai dipeda.

Siti ari utai ti rindu amat meda ba Desert Botanical garden iya nya meda pemesai cactus Saguaro! Nya baru tinggi enggau besai cactus tu. Alit endar ati aku meda burung tau inggap ba cactus ti beduri!

Hari ke penudi kami din, entua laki aku enggau kami duai Doug bisi ngagai Boyce Thompson Aboretum. Kiraka sejam penyauh alai tempat tu ari hotel kami. Rindu endar aku meda cactus Saguaro tumbuh sepemanjai jalai ti dipansa! Bakaka ditanam!

Bulan baru tu ila, enti nadai penanggul Doug bisi kemisi seminggu. Kami menyanak bisi ati nemuai ke Washington DC. Arapka hari maya nya ila enda entu chelap iga! Iya ga agi musim chelap!

Lauk Enchaluk

2011-01-30T15:02:00.000-08:00

Nadai bukai pengawa bala geng ba Facebook. Kerja berapi! Rindu amat meda utai dipanduk bala pangan. Kepuas ngiga resipi kuih ba website indu Cina ari KL, tepeda aku resipi janik guring enggau enchaluk. Janik gulai enchaluk?! Nanya magang bala pangan laban ti enda kala meda lauk janik guring enggau enchaluk!

Anang enda nguji kita laban nyamai amat panduk stail baka tu! Nadai mayuh macham utai digulai dia - bawang merah, bawang putih, chabi, ai asam jawa mimit, garam mimit, gula mimit enggau 2 sudu enchaluk. Isshh, anang enda nguji!

Pagi tadi agi belala nyawa makai enchaluk alu ngukus telu gulai enggau enchaluk! Ngelama tu enchaluk diguring enggau telu sigi kala aku meda tang chara indu cina Nonya tu, main kukus. Nya meh utai dempa enggau asi bubur pagi tadi! Laju kayuh, nya pan ulih nagang diri makai asi bubur kelalu mayuh!

Bah, nama lauk bala kita sahari tu?

Pengawa Ujung Minggu

2011-01-18T19:24:00.000-08:00

Ujung minggu tu kemari kami menyanak bisi ke South Lake Tahoe, nemuai baru ngagai pangan aku ke diau din. Iya meh ti alai kami ngintu Krismas tu kemari. Manah amat mua hari maya kami ke din. Seleka salju nadai meh meda tang salju agi tebal ba tanah. Laban nyu udah seminggu nadai turun salju, mupuk lela iya ke ba perabung rumah enggau iya ke ba tanah.

Kami dibai pangan aku raun meda Lake Tahoe. Amat manah endar ga danau nya maya musim chelap. Ku pangan aku, sepatut iya burak laban salju sida bukit, tang laban seminggu udah nadai salju turun, nyu tampak gadung tisi bukit. Arapka agi turun meh salju sebulan dua bulan tu.

Nah, sapa enda rindu meda utai baka tu? Nya meh ngachit mengachit kamera meda utai ngemanah tu maya lemai hari!

Maya musim panas ila, engka bisi kami kin baru, sekali tu nganjung diri camping. Gaga amat bala anak ninga rita pasal camping. Siti aja utai ti dikenangi aku. Bisi beruang menua nya dia! Ni alah maya kitai tinduk dalam kemah tak tama beruang! Eeek!

Bulih!

2011-01-14T16:11:00.000-08:00

Haha, anang guai, nadai aku tu bisi kena tikit alu bulih duit beribu! Utai ti ngasuh gaga, iya nya meda diri bulih endar sahari tu ngambar burung House Finch! Bemua meh gamal hari pagi tadi tang ati ti enda liat meda pemayuh burung inggap ba pun walnut enggau nutu leka rumput ba tanah.

Lubah lubah meh aku ti mansang semak agi mai tripod enggau camera/telescope ba tanah. Ninjik ga burung ka nikal udah aku ke jenuh bediri ba tengah tanah ngipa sida.

Udah kelama aku ke bediri ba luar, mata panas pan mupuk pansut. Tang siti aja penyalah. Burung ka diipa udah beterebus lari laban bisi burung woodpecker inggar terbai mansa sida. Geram diri ga kitai laban maya mata panas pansut burung nadai siku nunga kitai!

Ka ngambar burung tang ...

2011-01-13T09:42:00.000-08:00

Amat enda puas endar ati aku lebuhka meda burung House Finches! Ngemayuh nya sida ba belakang rumah aku taun tu, tang nya meh aku enda entu ulih ngambar sida! Hari selalu bemua, tambah lindung ari pun eucalyptus ti berintai ba tisi rumah, lalu aku empu enda ulih duduk ba luar ngipa sida! Hari kelalu chelap! Laban hari ti selalu bemua, gambar ke diambi nyu enda menyana laban ti enda chukup "lighting" enggau kelalu balat "backlight".

Enti aku pansut mai telescope kena ngambar sida pan nadai guna. Nadai burung ka ngenat diri meda mensia pansut! Meda ayung kitai deh bekebus sida terbai lari!

Naka tu meh gambar ke ulih diambi aku ... ari jauh. Amat enda puas laban enda entu terang!

Satay! Satay!

2011-01-11T13:58:00.000-08:00

Asai ti ke betanda aku meda kuah satay aku nyadi, alu satay ke ditunu ba oven mit ngemanah nya gamal!

Ngelama tu aku endang nadai kala nguji ngaga satay laban ti amat enda nemu. Tang bala pangan ba Facebook ti nemu ngaga ngumba endar ga mantai gambar satay ti udah digaga sida. Kati kitai enda meliur ngapa ti meda gambar sida! Nyau meh bekareh ngiga resipi satay, engka tak bisi resipi ti enda pedis ditunda.

Naka pengaga meh tetemu ka resipi indu Cina ari Malaysia ti diau ba menua kami ditu mega. Amat muntang endar ga chara ngaga iya. Mata ngelama tu enda tak ngiga resipi!

Bah, anang malu jengkau dia satay kala agi angat! Agi mayuh iya ke benung ditunu din!

Kemisi Musim Chelap

2011-01-07T11:19:00.000-08:00

Gamal jalai ke di tengah lebuh ke South Lake Tahoe.

Musim Krismas tu tadi, kami menyanak dikangau pangan aku (indu Cina ari Sarikei/Kuching) ke diau di South Lake Tahoe ngintu Krismas enggau iya din. Mupuk meh kami kena ngalih hari 24hb Disember. Kala orang udah manggil neh! Bala anak sigi gaga amat laban menua South Lake Tahoe ba bukit (kiraka 2 1/2 jam ari rumah kami) alu tebal meh salju maya nya din.

Sereta datai din, bala anak alu beguai nganjung diri bemain ba salju. Gaga meh orang. Denice ke buyan pen nyu merani ke diri nepan sled alu gelunsur ba salju!

Ngumba endar ga aku - lebuh ke ngambar bala anak ba baruh bukit mit, enggai enda kena langgar Duncan ti nepan sled ke berat! Nyau telentang rebah laban kena langgar! Lapa deh, nyu biru betis ari baruh pala patung dataika buku ali! Amat ngumba endar ga nasib aku sahari nya!

Ngalih hari hari Krismas kami dibai pangan aku enggau laki iya raun meda menua semak South Lake Tahoe. Pama endar ga penebal salju ba menua ke dipansa! Menua siti ti enda entu jauh ari South Lake Tahoe iya nya dikumbai Kirkwood. Ba Kirkwood dia bisi ski resort. Aku sekali udah kin tang Doug enggau bala anak baru iya kin. Ngemayuh nya mensia bemain ski enggau snow boarding din.

Tengan bulan satu tu lagi, engka bisi kami menyanak ke South Lake Tahoe baru laban maya nya bisi hari diau ngintu Hari Martin Luther King. Enti kami enda ngambi peluang nya ke South Lake Tahoe, naka maya Krismas nya aja meh bala anak sempat bemain ba salju. Menua alai kami diau endang tau dikumbai ukai alai salju turun. Tekalih dunya enti salju tak turun ba menua kami nya!

Bah, naka tu aja cherita aku sekali tu! Arapka kita teperindan meda gambar ke dikunsi aku ditu!

Taun Baru 2011

2011-01-06T17:03:00.000-08:00

Sahari tu udah hari ke enam ba taun baru 2011. Kati, bisi insur taun tu ari taun ke udah? Tauka taun tu agi biak alu apin temu pengujung iya ila!?

Sapa bisi ninga rita pasal taun tu meh taun Tuhan Jesus datai baru? Nadai udah ninga rita nya kita? Tauka kita ngumbai taun 2012, taun dunya tu kiamat? Sapa nadai udah meda wayang 2012?

Nah, tu meh utai ti dipansa aku lebuhka nganjung diri makai ba hari penudi taun 2010 tu kemari. Enda takut kita meda utai ke disebut ba billboard tu?

Anang irau! Besedia aja kitai, laban nitih ku Tuhan Jesus, iya deka datai baru baka penchuri ti deka tama ngagai rumah kitai! Nadai aku kala ninga penchuri dulu madah diri ka datai enchuri ba rumah kitai!

Harold Camping, tuai raban Kristian ti arapka penatai baru Tuhan Jesus iya nya kena 21hb May, kala udah ngaga "prediction" baka tu. Dini nya Tuhan Jesus bisi datai ba haribulan ke disebut iya suba?!

Nah, atur pengidup kitai bakaka Tuhan Jesus deka datai pagila. Lebuh iya datai, kitai endang udah dipeda iya besedia. Reti nya tadi barangmaya iya datai, kitai endang udah besedia alu nadai utai dikirau agi!

Selamat Taun Baru 2011!

Selamat Taun Baru 2011

2010-12-30T17:29:00.000-08:00

Selamat Taun Baru 2011 ari kami sebilik! Ngajih ke kita bulih berkat, pengerai enggau umur panjai dalam taun baru tu!

Selamat Hari Krismas 2010

2010-12-23T14:21:00.000-08:00

Selamat Hari Krismas ngagai pembacha Pemerindang Puteri! Berkat Tuhan enggau kita sebilik maya musim Krismas tu enggau sepemanjai taun baru 2011!

Kami menyanak enda ngintu Krismas ba rumah diri empu taun tu. Pangan aku, Louisa (indu cina puchau ari Sarikei), udah ngangau kami ngasuh kami ngintu Krismas enggau saduai laki iya ba rumah sida di South Lake Tahoe.

Penudi iya kami kin iya nya bulan satu pun taun tu tadi. Bala anak gagit amat ninga kami ka ke South Lake Tahoe. Menua nya atas bukit din, lalu penuh balut salji. Nitih ramalan cuaca hari Krismas tu lagi, endang bisi turun salji.

Reti nya White Christmas! Au, bisi meh aku bekunsi gambar White Christmas tu ila!

Sekali agi, Selamat Hari Krismas!

Kek Buah

2010-12-21T09:53:00.000-08:00

Gaga amat aku kek buah ke digaga aku sahari nya nyadi! Amat baru iya meh aku ngaga kek buah sekumbang ka udah belelang ngagai menua Amerika. Kelia menya bisi ga kala nulung indai aku ngaga kek buah ... nulung aja, endang sigi enda nemu!

Orang ke meri aku resipi kek buah tu bisi mega meri aku resipi kek sarang. Nya utai ti ka diuji aku ila! Amat teperansang meh aku laban kek buah nya nyadi!

Kati, bala kita bisi enggau orang ngaga sida biskut enggau kuih kena nyambut musim Krismas taun tu?

Embun Tebal

2010-12-16T09:51:00.000-08:00

Tu meh gamal hari kami sahari tu. Rumah orang belakang kami nadai dipeda sekali. Maya aku ke nganjung bala anak pagi tadi, irau aku meraka simpang enggaika bisi kerita dalam embun ti enda ulih dipeda. Ba endur ti tebal amat, utai ti ulih dipeda mina naka 60 metre aja. Jauh ari nya sigi amat enda dipeda.

Enti embun ngenebal tu lebuh malam hari sigi enda mindah aku. Iya ga sekeda orang mai kerita baka tak lansik amat mata, bakaka mai kerita lebuh hari panas terit! Amat takut alu begedi meh kitai meda orang ti kelalu amat.

Nya meh enti udah aksiden maya embun tebal, endang bebelas buah kerita belantak betenda udi (pile-up)!

Cherita Semadi Nadai Musim Krismas

2010-12-15T13:11:00.000-08:00

Bala geng ba Facebook gagit endar mantai gambar sida kek buah, enggau lauk ke udah dipanduk, nyu meliur diri kitai ke meda gambar sida!

Kemari aku bisi meli mee ari supermarket semak kami ditu, lalu nya meh diguring pagi tu tadi kena ngisi perut pagi hari. Ngumbai nya asai mee guring dipanduk kedai kupi di menua din, enda ga, tang enti nadai alai ngiga utai ti dikedka ati, mee ti diguring diri empu tau endar ga dikenyadi!

Dudi ila aku ngena mee tu, nemu aku enda ngerebus iya kelalu lama! Jampat kembai mee tu! Asaika enda lama meh aku nyimpan mee nya dalam ai ti udah melidih. Amat enda berapa!

Lemai tu lagi, nguring baru ga aku ke empa bala anak. Bala anak enggai meda utai mayuh macham dalam mee guring. Enggai meda sida sayur tauka sida tugey. Sida fish ball enggau sirap manuk tau tang enda tau mayuh. Nyelai endar ga!

Bah, naka tu aja cherita semadi nadai sekali tu!

Temuai ari Miri

2010-12-14T17:55:00.000-08:00

Pangan lama aku ari Miri ti benama Audrey, bisi nemuai ngagai kami lima malam. Iya endang udah di menua kami ditu laban ti nemuai ngagai anak iya dua iku ti benung belajar ba sebuah university di Idaho.

Semadi ti buring meda menua Idaho aja, aku alu ngangau iya ngasuh iya nemuai ngagai kami di California. Rindu diri meh iya ulih nemuai ngagai kami!

Nya meh lemai hari lima tu tadi, kami mai iya ngagai rumah Sassman ti endang nyadi annual Christmas destination bala ti endang rindu meda pemanah rumah iya maya musim Krismas. Nadai kala iya meda utai baka nya, ku Audrey. Rindu diri iya meda lampu pelip ngemalat nya!

Udah nya lemai hari enam dibai kami bejalai meda Old Town, Sacramento. Rami orang bejalai sebelah Old Town malam nya. Ni ka bejalai ngena baju tinduk! Apu, ku ati aku din! Paduhal orang ngena baju tinduk laban ti ka begambar enggau Santa Claus!

Hari siti nemuai ngagai San Francisco bala kami. Ngenyuah nya udah kin, agi meh tesat! Balat endar!

Enda ngawa ga tesat jalai ngagai Golden Gate Bridge. Laban maya nya agi tebal embun. Makai meh kami dulu alu raun sebelah Ghiradelli Square. Meda hari nyau mupuk petang beguai kami ngagai Golden Gate Bridge. Baka ti nganti kami mua hari, laban mata panas alu pansut lebuh ti mupuk kin! Sempat meh kami begambar sebelah Golden Gate Park, laban enda lama udah nya alu petang hari.

Nya aku madah ngagai Audrey, nemuai baru ngagai kami taun dudi ila. Iya endang bisi ati ka nemuai ngagai bala anak iya baru taun nyin ila. Pagi tadi laun Doug nurun kereja laban ti dulu nganjung iya ngagai airport.

Aku endang rindu amat meda bala pangan lama ulih datai nemuai ngagai kami ditu. Bah, kitu meh kita ti bisi belanja raun meda menua!

Peminta Bala Nembiak Musim Krismas

2010-12-08T12:35:00.000-08:00

Gagit amat bala anak nganti hari Krismas datai. Duncan udah nyendia list - utai dipinta maya Krismas taun tu. Naka ayam dipeda iya ba tv ditulis iya magang ba list iya nya.

Nya aku madah ke saduai diri menyadi - ayam saduai mayuh, nyu abis kena indik lebuh bejelai sebelah rumah. Aku sigi enda meli saduai ayam agi, seagi iya ke bisi enda diintu manah!

Kasih saduai iya! Computer,microscope, enggau globe aja ti disemaya orang. Utai bukai meda baka ila! Denice nadai mayuh utai pinta - orang minta handphone ti ulih dikena betelipun enggau bala kawan ku iya. Issshhhhh, nadai aku ka meri saduai handphone! Enti ka bayam handphone, mayuh handphone lama dia! No connection, ku saduai kumplin!

Aku nadai enggau orang minta prizin. Kapa nganti orang meli prizin, meli kediri empu, neh!

The Big Five O

2010-12-03T14:08:00.000-08:00

Pia gaga, pia sinu meh ngenang diri udah manggai umur lima puluh. Gaga laban udah diberkat Tuhan umur ngemanjai tu. Sinu laban taun ti udah belalu ukai nya ulih diambi pulai. Sinu mega laban berapa iku enda pangan ti udah dulu ninggal menua injau tu lalu sida nadai meda diri manggai umur baka umur aku sahari tu.

Tang nya meh, kitai idup ba menua tu ukai nya enda nemu diri nya baka bunga babas. Sahari tu bisi, udah nya hari siti nadai agi. Tang naka iya hari ti udah diberkat Allah Taala ke kitai diterima enggau dua iti tapa jari ti dikerembai manah - diterima enggau besai terima kasih.

Aku geli ati meda kad diberi bala anak. Enggai enda meri duit $1 siku ga! Udah nya saduai enda teranti madah diri ka meli kuih, alu nanya nama bansa kuih ti dikerindu. Cheese cake with fruit, ku aku. Nya meh orang rauh rauh madahka Daddy kuih ti dikerindu aku!

Lemai tu lagi, kami menyanak makai ba restoran baka selama. Pagila baru kitai ngintu hari nya spisil agi, ku orang. Enda meh aku nemu prugrim ti udah diatur orang ke aku!

Nah, bala kita ti enda nemu penuai aku ngelama tu, nemu meh kita sahari tu!

Meli Christmas Tree

2010-12-01T20:54:00.000-08:00

Gaga amat bala anak dibai nurun meli Christmas tree lemai tu tadi. Baka selama, kami meli Christmas tree ari Boys Scouts. Tiap taun sida bisi ngirum diskaun kupon $5 ngambika kitai ka pulai meli Christmas tree ari sida.

Bala anak kaung kaung ngasuh ngias Christmas tree nya, tang meda jam udah laun, pagila aja ku aku. Bala ayam saduai nyu bereba sebelah ruai. Dini nya bisi alai nganchau perengka ti ka digantung ba Christmas tree!

P.S. Enda chundung gamal pun kayu kami nya?! Asaika udah diadu ga nya tadi!

Thanksgiving Weekend

2010-11-30T17:16:00.000-08:00

Taun tu kami menyanak ngintu hari Thanksgiving ba sida entua aku. Siku ipar, laki iya, enggau anak saduai bisi enggau kami makai lemai sahari nya. Entua indu aku baru 4 minggu udah beputung pala putung (knee replacement surgery). Tang taja pia, iya agi ulih nyendia pemakai lemai nya. Ngena chara muntang aja, ku iya. Nya ku aku, kering indai tuai nya! Pedis meh ku iya, makai ubat alu tat aja. Nadai ku enggau ga, ku iya.

Denice saduai Duncan gaga amat ulih betemu enggau petunggal saduai. Hari siti petunggal saduai alu bisi bemalam ba rumah ini iya begulai enggau kami.

Pagi hari lima kami duai Doug bisi enggau orang begau suping Black Friday. Mina kami duai enda enggau orang berebut nganti ba mua pintu ari tengah malam! Kapa kiruh, hari ngenyelap nya! Aku mina meli gari kediri empu, enggau gari ke Denice. Doug bisi ga meli perengka elektronik.

Hari enam kami bisi nurun main sukan nimbak ba tanah ipar aku ke biak sekali. Anak tuai iya ti ngangau kami. Denice tumu udah madah diri enggai enggau. Tedah sigi buyan endar - sigi enggai ninga letup senapang.

Balat pengaga Duncan. Semua senapang, enti diasuh, ka diuji iya magang. Ninjik ga Daddy sabar alu sanggup nulung iya nimbak dua bengkah senapang. Aku sempat nimbak pistol siti, enggau senapang siti. Target ti ditimbak, kena tauka enda ...

Kami menyanak mina dua malam aja ba rumah entua aku. Dua malam udah nya kami bemalam ba barn kami di Los Osos din. Gaga amat mayau kami (bisi enggau tedah) laban sempat "bemain" enggau tikus din!

Naka tu aja cherita pasal pengawa kami menyanak musim Thanksgiving taun tu!

Chelap!

2010-11-24T17:05:00.000-08:00

Chelap! Aku ngelaban chelap pagi tadi nurun ke pasar udahka nganjung bala anak ke sekula. Maya aku nganjung saduai, penyelap hari -1°C. Baru iya meh hari kami ngenyelap nya musim tu.

Tudah Denice ngena boot ti udah sendat nurun sekula. Orang ga ka! Nya kebuah ke pasar pagi tadi, ngiga kasut boot ka iya. Nya meh orang ari pulai sekula tadi ngena kasut boot baru nya. Mina dibuka maya ke mandi, udah nya dipasuk ke baru.

Kelimpah kasut boot, aku bisi meli stukin chelum enggau burak ke Denice mega. Iya enggai ngena tanchut panjai nurun sekula taun tu, mina uniform gaun aja ti ka dikena iya. Nya meh bebeli ke stukin enggau kasut but. Stukin lama mina sepasang aja agi umbas.

Ba pasar tadi, aku mina meli semacham sayur. Lemai kemari aku bisi ngasuh Doug meli itit panggang. Nya meh lauk kami demalam, lalu nya meh lauk kami malam tu mega! Hehe, agi mayuh itit. Sayur kena nambah lauk!

Pagila mupuk kami ngagai sida entua aku laban ti ka ngintu Thanksgiving din. Ngena ga hari nadai ujan pagila, mina chelap aja.

Bah, naka tu aja cherita sekali tu! Happy Thanksgiving!

Waning Gibbous

2010-11-23T20:23:00.000-08:00

Demalam aku enda tingatka bulan benung ngembung. Ingat pen aku nadai meh guna. Awan tebal ba langit demalam.

Malam tu meda awan nadai entu tebal ba langit pansut aku ngiga bulan. Nama deh, terang amat bulan lalu nadai utai ngelindung. Tang lebuhka ngachit mengachit, kamera mansa awan. Tang enda lama aja bulan nya lindung.

Tu meh gamal bulan digambar aku malam tu. Penyakit gila bulan, eh!

Cherita Semadi Nadai Hari Satu

2010-11-22T17:12:00.000-08:00

Meda hari nya bisi panas mimit, pansut aku mai kamera enggau telescope, ngipa burung. Tiga hari beturut hari kami ditu bemua enggau ujan. Nyu lelak ga meda hari bemua sehari hari. Dia meh aku bediri degir degir lemai tadi nganti burung.

Rindu endar aku tepedaka burung hawk tu ti bisi inggap ba tiang pagar orang seberai kami. Selalu atas langit din aku meda burung tu. Enti enda ba langit din, inggap ba tali karan maya aku ti mansa mai kerita. Nya ti ngasuh rindu diri aku ulih ngambar burung nya lemai tu!

Bah, naka tu aja cherita semmadi nadai sekali tu!

Gigi Simpak

2010-11-16T19:25:00.000-08:00

Tengah hari tu tadi aku bisi betemu enggau lutur gigi. Ninjik ga ulih betemu enggau lutur gigi sahari tu laban demalam gigi ti endang udah betampal simpak alu tingkil. Nyu nyilu meh asai gigi nya lebuh ngulum ai maya ti nuchi gigi.

Gigi ti pechah nya alu di x-ray enggau digambar. Ba menua kami ditu nadai kala sekali betemu enggau lutur gigi .. enggai enda dua tiga kali baru tembu gigi diadu! Sahari tu mina nampal lubang - di"seal". Bulan dua belas lagi baru ulih di adu - ka ngaga crown. Ka meh aku tumu agi ari nya, tang nya meh nadai alai - udah booked magang hari!

Akai, merinsa endar ga nya! Enggai meh gigi nya ngaga hal maya di Miri kutai! Nadai ga kiruh nganti ngelama nya! Rega ngadu gigi siti nya enda ibuh sebut ... ulih meli kamera canggih aku ngena duit nya!

Lemai Hari ba Consumnes River Preserve

2010-11-15T21:53:00.000-08:00

Rindu amat aku meda kaler langit lemai kemari ba Consumnes River Preserve. Aku mai bala kin laban ti ka ngambar Sandhill Cranes. Ba paya tu meh alai Sandhill Cranes pulai tiap lemai hari. Pagi tumu sida angkat ngiga pemakai, udah nya lemai baru sida pulai. Hari kelalu petang ni nya ulih digambar. Kamera shutter speed ma udah kelalu slow, nadai temu gamal utai diambi. Kabur magang.

Rami bala parking ba tisi jalai nganti Sandhill Cranes pulai. Rindu amat meda burung terbai alu terengkah ba paya, tang nya meh nadai menyana siti gambar ka diambi. Gambar mata panas padam aja lah sekali tu!

Gila Bulan Musim Gugur

2010-11-12T23:52:00.000-08:00

Rindu amat ngambar bulan ngena telescope! Endang peda amat sida lubang lubang ba bulan neh! Klik gambar enti ka meda iya besai agi.

Anang nanya pasal Ini Andan. Nadai aku bisi meda iya ba bulan. Engka udah turun ngiga sida upa, kulat enggau rambai!

Camera + Telescope

2010-11-10T13:11:00.000-08:00

Bisi endar ati ka meli super zoom lens tang enda tebeli. Taja pia ati bisi endar ka ngambar utai jauh agi. Pengujung iya telesope dibeli. Nama chara ngambar utai ngena spotting scope tauka telescope iya nya digiscoping.

Pagi tadi tu meh pengawa aku - duduk ba semin nunga tiang telipun nganti burung inggap dia. Burung woodpecker endang selalu inggap dia, nya meh nyamai amat ngintai iya.

Kiraka tau dikenyadi meh ngambar utai ngena telescope. Nganti udah nemu agi ngadu focus ba telescope engka manah agi gamal utai ti digambar. Arapka pia meh!

Main Kamera

2010-11-03T19:37:00.000-07:00

Temu kiruh bemain enggau kamera nyu nadai hari update blog! Tu sekeda gambar diambi aku sahari tu enggau kemari.

Painted Lady

Rindu aku meda kesulai tu bisi nutu bunga aku sahari tu. Sepemanjai musim panas tu tadi, tak nadai meda kesulai bansa tu ngetu ba kebun bunga aku.

Yellow-rumped Warbler

Diatu sigi musim burung. Burung baka Yellow-rumped Warbler ti ba gambar atas mina dipeda maya musim gugur. Sida burung tu terbai ngagai menua baka California laban ti lari ke musim chelap.

Sandhill Crane

Nama burung ti baka burung bangau tu Sandhill Crane. Burung tu datai ari menua Alaska enggau Siberia. Tiap musim gugur sida tu selalu ngetu ba menua California, lari ke musim chelap. Bala sida ansa ari menua Canada enda ibuh sebut, endang mayuh dipeda ba alai ti bisi ai. Pagi tadi asa asa ati ngumbai sida Sandhill Crane agi begumpul ba kebun orang enda jauh ari rumah kami ditu. Agi belala ngambar sida!

Harvest Festival 2010

2010-11-01T16:40:00.000-07:00

Seminggu minggu Duncan saduai Denice nganti hari tu - Harvest Festival ti beserimbai enggau hari Halloween. Denice gago pasal costume, Duncan gago pasal main game enggau ngulih sida gula batu, chocolate ...

Hari enam kemari kami bisi ke pasar, alu bisi tetemu ke costume ti dikerindu ke Denice. Nyu ka enggai aku meli tang meda nya udah diskaun 60%, tau ga lah, ku aku. Duncan enda peduli, costume Spiderman nyu udah sempit kena aja! Asal aja agi ulih tama!

Rindu amat saduai bisi betemu enggau bala sida ti sama sekula enggau saduai. Bendar meh aku ngambar saduai enggau bala school mate saduai. Denice kurang agi kena gambar laban iya ti enggau Daddy, alu Duncan enggau aku. Bisi kamera bukai, enda nemu kebuah enda ngasuh Doug mai siti ke dikena iya empu!

Bendar amat Duncan ngisi bakul iya - naka iya main ti bisi dia, main aja laban tiap kali nuan main, nuan bisi bulih sida gula batu.

Duncan laban ti ganas agi, penuh meh bakul. Enggi Denice setengah bakul aja, tang kiraka pama laban bakul iya besai agi ari enggi Duncan. Udah datai ba rumah, disimpan Daddy sida gula batu saduai enggaika orang naka ati ngambi! Enda tau ngambi kediri, enggai enda nganti Daddy tauka Mommy meri, baru tau makai!

Kati bala kita, bisi enggau orang ngintu Halloween?

Chelap!

2010-10-27T16:18:00.000-07:00

Hari ba menua kami diatu kiraka udah mupuk chelap. Pagi tadi chelap agi ari ke udah asai hari dataika ka nikal ke rumah ngiga baju chelap tebal agi lebuh ke nurun nganjung bala anak nurun sekula pagi tadi!

Nya meh lembau endar asai tubuh limpang nganjung diri ke pasar udah ke nganjung bala anak ke sekula tang laban ti ngenang nadai agi sida sayur ke lauk, ka pen enda. Ninjik endar ga bisi ngetu ba pasar laban bisi tepeda ka daun ubi enggau kangkung! Ngelama tu nadai meda daun ubi agi ma ukai musim panas. Beguai guai meh aku meli sida sayur pagi tadi laban ti enggai ngelaban chelap.

Nya meh udah datai ba rumah alu tenguk ka makai sup angat. Tu meh gamal kway tiaw segera ti dipanduk aku kena ngangat ke tubuh! Tau endar dikenyadi!

Golden-crowned Sparrow

Udah tubuh nyu angat mimit alu pansut aku mai kamera ngiga sida burung ke digambar. Enti udah pasal ngambar burung, tubuh nyu enda irau ke penyelap hari! Nya tanda kitai udah gian!

Chicken Pot Pie

2010-10-26T19:49:00.000-07:00

Meda Duncan tak agi belala maya aku ke ngaga chicken pie ujung minggu tu tadi, ngaga baru aku sahari tu. Nyu beguai beguai aku ngaga meda jam nyu ka maya ngambi anak pulai sekula.

Lebuh ke pulai ari sekula, aku alu tingat ke "chicken" nadai ditambah maya ke nunyau pot pie nya tadi! Naka naka meh nya! Aku enggai pen makai vegetarian pot pie!

Pengujung iya diguring kediri kerat manuk alu ditabur ba pinggai lebuh ke makai pot pie nya tadi!

Udara Nyaman

2010-10-25T17:09:00.000-07:00

Top L-R: Ruby-throated Hummingbird, Northern Flicker Woodpecker

Bottom L-R: Nuttall's Woodpecker, Ruby-throated Hummingbird

Nyamai amat asai hari pagi tadi udah bekau ujan sehari hari kemari. Langit terang, bau pun eucalyptus enggau pun pine pen nyu ngesuh ba lubang idung! Udara sungguh segar dan nyaman munyi ku jaku laut!

Kebuah bau ngenyamai nya disium laban diri ti bediri nunga pun eucalyptus merening burung lalu tambah mega pun pine enda jauh ari pun eucalyptus ti alai burung hummingbird nya belagu.

Nyu rindang diri aku sahari tu betitih ke burung hummingbird enggau woodpecker. Sayau zoom lens ti dikena ba kamera enda lebih canggih agi ari nya!

Kartun

2010-10-24T15:07:00.000-07:00

Demalam kami duai Doug bisi enggau fund raiser ti diatur Rotary Club. Siti ari jalai sida ngumpul duit iya nya ari pengelandik siku ti neraw gamal kitai baka kartun. Endang lama udah aku ka duduk nunga pelukis minta gamal diri didraw tang lembau endar ga asai laban mayuh orang mansa alai pelukis bakanya ti selalu duduk. Tang demalam orang temu kiruh betanda enggau ninga karaoke, nadai meh orang ibuh lebuh kami duai Doug ti duduk nunga pelukis kartun nya.

Nah, bisi gamal kami duai Doug ba gambar nya?

Camping ba belakang rumah

2010-10-17T11:08:00.001-07:00

Nya meh pengawa bala anak demalam. Daddy bisi meli tent mit apin lama tu tadi, umbas alai sida tiga menyanak besekut dalam nya. Kapa meh aku dibai sida tiga besekut dalam utai ngemit nya!

Laban ti enggai kiruh nganchau canvas atas tanah, nya meh tent nya didiri atas semin ba patio belakang. Semadi enggai enda ngerindang bala anak ti kiak kiak mai becamping meh nya!

Penyakit LBA

2010-10-14T16:46:00.000-07:00

Tu sekeda gambar diambi aku minggu tu. Aku bisi meli 2 iti pekekas kena ngambar utai. Siti dikumbai 50mm macro lens, enggau siti dikumbai 2x macro focusing teleconverter. Kedua pekekas tu utai "terpakai" lalu rega iya tau dikumbai murah.

Pekekas kamera dua iti tu meh utai ti balat amat ngerindang aku minggu tu! Nadai irau ke hari angat lebuhka ngeringak duduk nunga utai ti digambar!

Aku bisi macha ba siti forum pasal penyakit ti dikumbai LBA. Ni, kala kita ninga penyakit nya? Enda kala?

Orang ti enda gila minching kamera dSLR anang irau pasal penyakit tu. Penyakit tu mina ngerampit orang baka aku. Nama penuh penyakit nya, Lens Buying Addiction!

Laban aku ti sigi rindu bemain enggau lens lama (manual lens), nya ti ngasuh aku nyamai amat kena jangkit penyakit tu! Tambah mega lens lama nya murah! Woohoo!

Enti bisi ubat tuchuk kena ngubat penyakit tu, aku sigi enggai ngubat diri! Biar sakit, you!

5 taun

2010-10-12T16:22:00.000-07:00

Sahari tu umur blog Pemerindang Puteri genap lima taun! Woo hoo!

♥ ♥ ♥ ♥ ♥

Quilt batik tu endang lama udah tembu (bisi 4 taun kini) mina apin di adu binding (tisi apin dilit). Sahari tu aku ngerajin ke diri - ngemas mija jait alu nguntin kain ti deka dikena ngelit quilt nya.

Mupuk meh aku nyait ngena injin jait kain lit nya ba quilt. Tembu nya, kain lit nya dilipat ke belakang lalu dijait jari. Tu utai ti lembau amat aku nereja! Lubah sereta pedis diri asai tapa jari kiba dibai megai quilt laban quilt nya besai.

Bisi siti agi quilt queen size dia ti apin dilit. Enti tak rajin asai, udah tembu ngadu quilt batik tu lagi, aku ka ngadu quilt siti nya.

Nya aja cherita sekali tu - kena ngingat umur blog ti udah manggai lima taun!

Mi Udang & Sambal Petai

2010-10-11T10:38:00.000-07:00

Lemai hari lima tu kemari, udah ke makai malam ba restoran Rice Bowl, kami menyanak bisi ngetu ba SF Supermarket. Amat lama endar asai aku nadai udah suping kia. Nya pan semadi stok beras nyu abis.

Gaga amat aku meda perencah kena ngaga mi undang! Beguai aku nyengkau berapa paket perencah nya. Pama endar ga sida perencah ari Malaysia ba supermarket nya sekali tu. Semadi nagang diri meh aku enda tak nyengkau mayuh agi.

Lemai hari enam aku alu ngasuh Doug nanya restoran cina semak kami ditu enti tau meli mi kuning ari sida. Ninjik ga sida ka nyual. Ba Galt ditu dini nya bisi alai meli mi kuning! Nyamai amat mee kuning nya dikena ngaga mi undang.

Tengah hari hari minggu aku manduk petai, kachang lendir enggau pusu ngena sambal ke beli aku hari lima nya tadi. Lemai nya manduk kari dagin kena nambah lauk. Nyu sirut sirut kami duai Doug makai lauk kari enggau petai! Teringat Doug maya iya ke duduk kediri ba restoran Melayu makai lauk pedas!

Promo: Our Book Project

2010-10-09T14:36:00.000-07:00

Apu, Vernon, ni enda senga idung pangan macha kelangkung nuan ba blog nuan nya!

"probably the most widely read Iban blogger in the world"? Heheh, enda nemu amat ke enda tang siku dua orang ti selalu sangkai ba blog aku ditu kiraka udah pama! Terima kasih ngagai kita ti rajin ngetu ba ruai aku tu!

Ditu aku ka mai kitai semua sama bela nyukung enggau wang ringgit pengawa Vernon ti deka nyelak bup pasal jerita kitai Iban. Pengawa iya tu tau dibacha enggau silik ba blog Our Book Project.

Pengawa nyelak bup tu ukai semina tembu ba bup Vernon empu. Barangsapa ti deka nyelak bup pasal jerita Iban ngena jaku Iban/English dudi ila tau mega nerima sukung ari tabung ti udah ditumbuh ari pengawa Our Book Project.

Aku bisi endar pengarap ba pengawa tu lalu ba penemu aku, prujik bansa tu mina tau mujur enti lebih mayuh kitai Iban nyukung sereta bisi meda penguntung ari prujik bakaka ditumbuh Vernon tu.

Enti ukai kitai Iban nyukung pengawa bansa tu, ari sapa agi?

Lunch Break

2010-10-06T14:20:00.000-07:00

Minggu nyin kemari asaika sahari aja aku bisi nurun nulung ngemata bala nembiak maya lunch break ba sekula. Bisi meh utai ti ngerindang enggau ngelimpang ke diri dataika enda tebai ke diri nurun ke sekula!

Minggu tu baru sahari tu aku bisi nurun. Nganti FedEx datai nganjung utai tegal enda ulih nurun, kenu. Utai ke dianti datai hari satu kemari enda ga datai, nyu hari siti baru datai.

Gaga amat bala anak meda aku datai sahari tu. Sekali tu mai kamera aku laban asaika lama udah enda mai kamera kena ngambar bala anak. Aku mina ngambi gambar anak aku empu, takut apai indai bukai enda rindu meda kitai ngambar anak sida without their permission! Ni kitai nemu neh!

Pengawa Hari Enam

2010-10-04T16:48:00.000-07:00

Lemai hari enam tu kemari aku bisi enggau orang rami makai malam ti diatur County Line Friends of the NRA. Doug nyadi Treasurer gerumpung tu, tentu lah kiruh iya lemai iya. Tumu iya endang udah datai ba alai pengerami nya. Aku driba kediri laban ti ka tumu pulai mega. Bala anak ditinggal enggau baby-sitter.

Pengerami taun tu kiraka enda ngerami taun nyin kemari. Siti ari kebuah iya nya ekonomi kurang amat ba menua kami tu. Tambah mega nya malam hari enam. Orang ke bisi bini anak engka bisi prugrim bukai ga maya ujung minggu.

Kiruh amat Doug sahari nya. Tumu pagi hari enam nya iya enggau bala raban Galt Lions Club ngintu gerai ti nyual breakfast enggau lunch ba Old Engines and Tractor Show. Pukul 5.30 pagi iya endang udah datai ba McFarland Ranch alai sida ti nyendia breakfast.

Kami duai Duncan nitih dudi - nganjung diri makai breakfast din. Denice endang udah enggau Daddy iya mupuk tumu. Engka tak enda entu tinduk iya malam nya laban ti takut tinggal.

Kiraka pukul 1.30 ngalih hari, kami alu pulai laban Doug madah diri ka tinduk enda lama sebedau iya mupuk ngagai pengawa FNRA lemai nya.

Sepemulai aku ari FNRA dinner malam nya, Denice endang udah tinduk laban ti lelak bekau ke tumu dani pagi nya. Enggai nyadi enda digerak ga laban enggai nyadi tinggal lebuhka nganjung baby-sitter nya pulai. Duncan enda ibuh disebut, endang bansa orang ti tan bejaga. Tang tetinduk diri ga saduai dalam kerita lebuhka nganjung baby-sitter!

Nya meh prugrim kami menyanak hari enam tu tadi!

Pengawa sekula

2010-09-30T15:53:00.000-07:00

Click gambar enti ka meda iya besai agi.

Enti aku di asuh pengajar neraw ayat ke diberi, enda temu tunga gamal utai didraw. Tang enggi Duncan tak menyana endar gamal utai nya! Mina "chick in the sand" aja enda didraw iya. Engka enda chukup jam.

Click gambar enti ka meda iya besai agi.

Enggi Denice baka enggi aku enti nya aku diasuh neraw ayat ke diberi pengajar! Bisi kelala utai didraw iya nya?

Nadai Ai

2010-09-28T16:31:00.000-07:00

Gambar haisan, nadai kena mengena enggau cherita sahari tu!

Ngumba endar ga pump telaga kami pagi tadi. Dia kitai udah ganjang ka mandi, tang setitik ai nadai meh pansut ari paip!

Nya meh aku mut mut, "This is unacceptable!" alu telipun ngagai Doug ti udah datai ba upis iya din. Nadai meh iya nemu pump telaga kami nya bisi jai. Maya iya mandi tumu pagi tadi bisi ga ai. Lemai kemari maya Duncan berendam ba bath tub ai endang udah kuning. Kati ku enda, endang udah langkang ai dalam tangki. Nya aku madah ngagai Doug, dudi ila ma ai dipeda kuning enggau berambuh, abas enggau pump telaga, engka bisi hal.

Nyu ngena ai butul kena empungas mua enggau merus ngeli kami tiga menyanak pagi tadi. Bala anak enda diasuh ngepam jamban enggaika nadai ai kena flush jamban maya aku ti ka melabur!

Ninjik ga siku ti ngerepair pump telaga kami suba ulih datai sahari tu ga. Nya ku siku nya, enda nemu kebuah sahari tu, enggi kami nya iya kelima pump telaga diadu iya sahari tu. Nyu pukul 2.30 p.m. baru bisi ai. Alu beguai aku mandi laban jam nyu udah ka chukup ngambi anak pulai sekula. Gaga bala anak ninga ai udah bisi lebuh saduai datai ba rumah.

Bah, naka tu aja cherita sekali tu. Agi ngenat hari angat kami sahari tu!!

Angat!

2010-09-27T16:04:00.000-07:00

Nitihka kalender, diatu udah musim gugur. Tang hari ba menua kami ditu bakaka agi belala musim panas. Pengangat hari ba alai kami ditu urung 38°C. Di Los Angeles din tak 41°C sahari tu! Mechah rekod, nitih ke berita didinga aku ba radio tadi. Sepemanjai minggu tu meh hari kami baka tu.

Amat udah gian meh aku tu, tak ngelaban hari angat pansut mai kamera! Mina tupi atas pala ti bisi meri lindung mimit. Nyu aruk gamal aku taun tu! Enda ngawa laban mata panas nya meri Vitamin D, tau ngasuh tulang kering!

Nadai utai bukai digambar maya dia taun. Sida tawir aja! Tu meh siti ari gambar diambi aku sahari tu sambil ngelaban hari angat. Udah hari mupuk chelap mimit ila nya baru sida burung ke selalu digambar aku bisi dipeda. Sida burung pipit enggau Western Scrub Jay mayuh tang siga amat. Nadai tau meda kitai mimit!

Nadai entu cherita aku minggu tu, nya kurang amat diupdate! Naka tu aja sekali tu!

Hot dogs

2010-09-21T13:24:00.000-07:00

"Call Daddy and remind him to get hot dogs and marshmallows," ku Duncan madah ke aku lemai kemari. Bala anak tenguk ka makai hot dogs enggau marshmallow ti ditunu atas api. Amat baru iya meh kami bisi nunu utai ba luar musim panas taun tu.

Aku mina pansut ngambar orang alu ngambi siti bun, hot dog enggau chilli. Udah nya alu tama baru, nadai meda bala ti betunu ke marshmallows.

Agi belala bala anak, alu nanya enti lemai tu lagi tau nunu hot dogs baru!

Ngerajin ke diri

2010-09-19T14:38:00.001-07:00

Kemari kerita aku dituchi orang. Sahari kiak kiak madah diri ka nuchi truck daddy. Iya ke bendar laban ti rindu bemain ai!

Gamal utai dituchi, anang enda aja. Anang enda ngasuh truck nya basah aja. Mayuh agi jam dibasau bepanchit ke pangan diri!

Cherita Hari Enam

2010-09-18T16:21:00.000-07:00

Tu gamal mayau aku ngipa indu tawir. Dia kitai ka ngambar indu tawir dia ga iya ka nangkap indu utai nya. Nyu berebut meh kami duai! Ma iya bulih endang dikunyah iya meh tudah tawir nya.

Sekali aku ngerampas indu tawir bechurak biru ari iya, indu tawir ti ditemu agi idup labuh ba semin. Dirampas ari mayau laban ti ka ngambar indu utai nya! Benung aku ngambar tawir nya, nya meh mayau aku alu bediri alu nawis indu tawir ti ba atas mija nya! Nyerauh aku laban kitai ti agi ngeringak ngambar indu utai nya! Dua kali iya nawis indu tawir nya! Apu, amat frust meh iya laban aku ti ngerampas tawir ari iya pagi nya!

Tu meh gamal indu tawir nya tadi. Di engkah atas daun enggau atas bunga morning glory ba atas mija ngambika manah agi dipeda! Nyu lepi tudah tawir nya laban sebedau aku ngambar iya, iya dikurung baruh tudung plastic. Nya meh enda engkebut lebuh ke digambar.

Duncan ringat lebuhka ninga indu tawir biru nya udah dilepas. Iya ga iya ti madah ke aku mayau kami bisi bulih indu tawir pagi nya. "I want it as a pet," ku iya madah ke aku. Ni lah indu utai ulih nyadi pet! Indu tawir nya dipanggai aku ba dan layu tu, enda lama udah nya nadai agi dipeda iya. Engka mupuk kering alu ulih terbai meh iya.

Bah, nya aja cherita semadi nadai hari enam aku sekali tu!

Bulan Syawal

2010-09-17T22:25:00.000-07:00

Lama udah enda mantai gambar bulan neh! Tu gamal bulan diambi malam tu. Endang ari ti nurun ke restoran aku udah berati ke bulan ba langit. Maya nya langit agi terang tang bulan endang udah terang ba langit.

Sereta aku datai ba rumah aku alu mai kamera enggau tripod pansut. Rindu endar ga ngambar bulan, kelebih agi enti terang gambar utai diambi! Barangsapa ti bisi kamera dSLR tau nguji ngambar bulan enti kita enda kala. Aku ngena lens manual lama 70mm-210mm, alu setting iya diadu bakatu - f8, IS0 200, alu shutter speed 1/200. Anang enda nguji! Tang mesti bisi telephoto lens ler .....

Tingkil Ngeli

2010-09-16T16:58:00.000-07:00

Kala diberi orang setipikit lebuh kita ke tingkil ngeli maya agi mit suba? Nadai? Aku nadai meh nerima setipikit!

Nah, Duncan pulai sekula sahari tu nadai ngeli sigi, alu bisi mai setipikit kena ngingat hari diri ke tingkil ngeli ti keterubah!

Dua igi ngeli baru ba baruh udah tumbuh, enda nganti ngeli tusu tingkil dulu. Nyu beringkat meh gamal ngeli ba baruh nya dia.

Enggi Denice bakanya mega, tumbuh dua igi iya ke ba baruh baru iya ke lama nya tingkil. Nadai meh dipeda rabang Denice nya! Ngeli ba atas alu apin tingkil. Bisi ke enda iya ke baru tumbuh ba atas orang empu nadai ga bisi madah, aku nadai ga bisi nerupung!

Nembiak kemaya hari tu nyamai amat. Ma ngeli enda lurus, tau diadu dudi ila. Iya ga apai indai enggai meda ngeli ti enda lurus. Kitai dini nya bisi suba. Mai ngeli beringkat meh tudah kitai datai ke tuai! Bisi ga orang udah besai tuai tu ngadu ngeli (masang braces), laban ti enggai agi meda ngeli ti beringkat meh nya. Tambah mega diri empu ulih mayar ungkus ngadu ngeli diri empu!

Bah, ka berapi agi! Naka tu aja cherita sekali tu!

Bejalai ba Consumnes River Preserve

2010-09-13T11:47:00.000-07:00

Lemai kemari, semadi ti duduk rumah nunga TV, manah agi bejalai meda sida jelu enggau burung ba Consumnes River Preserve! Rindu amat aku meda bala ansa ti datai ari menua Canada udah mupuk ayan ba Consumnes River Preserve.

Aku enda tingat ke endang bulan sembilan bala ansa enggau itit udah datai ba menua nya. Taun nyin kemari, maya bulan sembilan meh kami ti bisi kin alu ti bisi meda sida ansa enggau itit. Burung ai bukai pen bisi endar dipeda dia kemari. Aku enda nemu ni penatai ai nya dia laban bulan empat kutai tak rangkai alai nya dia. Maya musim panas sigi jarang amat ujan ba menua kami ditu.

Burung tu dikumbai Great Blue Heron. Aku bendar nyerungkung bejalai lubah lubah mansang semak. Tang ukai nya tau meda mensia, alu terbai.

Bisi hari ila bejalai ba Consumnes River Preserve lebuh tumu pagi. Maya lemai hari kitai ti ngambar sida burung nyu ngelaban mata panas. Enti pagi hari, mata panas ba belakang kitai ti ngambar utai. Manah agi gamal utai digambar enti utai nya betunga enggau mata panas ari ti melakang ke iya.

Musim gugur berengkah kena 23hb sembilan. Hari kami ditu nyu mupuk enda entu angat iga. Endang digiga hari ti enda entu angat!

Gambar Hari Minggu

2010-09-12T16:24:00.000-07:00

Udah kami ke pulai ari Mickey Grove Zoo hari minggu nyin kemari, kami menyanak bisi ngetu ba Lodi Lake. Menua nya endang dipansa selalu tang nadai kala ngetu. Meda bala nembiak nadai ampit bemain ba playground di Mickey Grove ngetu kami dia ngambika bala anak enda asa asa ati.

Doug ngemata bala anak bemain, aku alu ngati kediri bejalai tisi lake ti nunga car park. Aku enggai bejalai jauh laban takut bejalai kediri ba alai ti enda entu telaba! Lake nya tau alai orang bekayuh, bekayak, alu bisi mega alai orang bemain jet ski.

Aku enggai mupuk tumu, enggai enda nganti mata panas padam laban ti ka ngambar biew nya! Tang mata panas ti padam dilindung sida pun kayu, nadai lah tak nyengala dipeda bayang iya ba lake nya.

Bisi bala itit enggau ansa dia, tang enda mayuh. Udah bulan sebelas ila, baru mayuh agi sida dia laban ti datai ari Canada. Bisi hari kin baru ila - tentu lah mai kamera!

Berendam

2010-09-11T18:35:00.001-07:00

Semadi nadai pengawa meh nya, pengujung iya bemain ai. Taja hari sahari tu angat, ai nya pama ga penyelap iya. Bisi setengah jam aja kini saduai ke bemain ai. Nadai ga tan berendam lama! Enti dalam bath tub, bejam jam ka meh saduai. Nyu abis jempuk sida rug dalam bilik mandi gasak orang betempap ke ai. Geram diri aku meda bekau saduai.

~ ♥ ~ ♥ ~ ♥ ~ ♥ ~ ♥ ~

9/11 - Never Forget!

Kari manuk gulai entekai

2010-09-10T10:40:00.000-07:00

Ku Coki, kari manuk digulai entekai, nyamai. Amat nyamai endar ga kari manuk aku digulai enggau buah entekai!

Lemai kemari aku nadai nemu nama lauk ka dipanduk ke lemai nya tang lebuh aku tepeda ke dua igi buah entekai ti agi kating kating ari pun iya ti ditanam dalam pasu besai, aku alu tingat ke buah entekai (ti diambi kutai) sigi ti apin dipanduk.

Beguai meh aku tama ke dalam rumah, ngambi manuk ari freezer, ngiga paket kari, alu berengkah berapi. Ka nguji ngaga kari manuk gulai buah entekai!

Udah mansau manah meh buah entekai ti digalau aku nya. Maya aku ngambi iya kutai, iya apin entu mansau. Manis agi asai iya laban ti udah mansau manah. Doug alu madah taun ila, tau meh nanam mayuh agi entekai bansa nya laban nyamai endar asai iya dipanduk enggau kari manuk.

Nah, tau meh kita nguji ngulai buah entekai enggau kari manuk kita! Gerenti nyamai!

Hari Kedua ba Sekula

2010-09-09T15:34:00.000-07:00

Baru ga hari kedua udah niki ngagai Gred Dua udah kena ukum! Tu meh gamal Duncan maya lunch break kemari. Anembiak bukai bemain magang iya diukum pengajar bejalai musin garis volleyball court sepemanjai lunch break! Bisi meh kebuah orang kena ukum, nadai ga aku nanya.

Laban ti kena ukum ba sekula, di rumah pen ditagang masang TV. Meda nya enda tau masang TV, saduai alu bemain di luar. Endang nemu endar muai jam - besurung ke pangan diri ngena luggage carrier, betimbak ke senapang ayam, bejelangkit ke truck Daddy, begumpul ke pine cones, begagai sambil ngirit luggage carrier enggau wheel barrow ... Akai!

Maggi

2010-09-08T14:04:00.000-07:00

Enda sinu kita ke diau di Malaysia ninga kami tenguk ke mee Maggi? Sekeda bala, baka sida ke diau di Houston, nyamai amat laban bisi kedai Cina din nyual mee Maggi. Supermarket Cina semak kami ditu, besai ngapa, mee Maggi lungau deh nadai nyual!! Amat enda berapa!

Nya meh ninjik ga tetemu alai ba internet ti bisi nyual sida Mee Maggi Kari enggau Mee Maggi Asam Laksa. Ngudar meh aku! Enda alang alang, tak 60 paket diudar aku sekali! Lubah amat ga nganti nya datai! Dua minggu ari hari ti ngudar baru datai!

Nadai meh nganti agi. Lemai iya ke datai bala anak alu minta "spicy noodles" (mee kari), alu kami duai Doug alu makai mee Asam Laksa. Nah, kapa enda dempa! Ma abis ngudar baru ga ila!

Gred Dua

2010-09-07T14:16:00.000-07:00

Sahari tu hari keterubah bala anak niki ngagai Gred Dua. Endang ari minggu nyin tadi saduai gagit amat ka berengkah sekula. Tang demalam nyu puas ngasuh saduai tinduk tumu! Orang nyu udah teleba bejaga sekumbang kemisi musim panas!

Duncan bagak endar dalam kelas tumu pagi tadi. Denice tak lembau duduk kediri ba mija iya. Ni enda, pangan keras iya ti benama Keli ari Gred Satu nadai agi besekula dia.

Nya meh gamal orang maya lunch break tadi. Denice berapa kali enda besebana madah diri buring laban Keli nadai enggau iya bemain. Sinu ga aku meda iya. Udah nya bisi ga anembiak siku besebana ke diri buring laban nadai pangan enggau bemain. Pangan ti enggau iya selalu bemain taun nyin tadi nadai agi besekula dia.

Sinu ga aku ngenang bala nembiak ti enda ulih nampung sekula dia. Ekonomi ba menua kami ditu sigi enda berapa, nya kebuah sekeda bala nembiak enda ulih nampung sekula dia agi. Ukai enda besai bayar enti dibanding enggau sekula perintah ti nadai bebayar. Nya meh maya lunch break tadi, tak enda mayuh gamal bala nembiak. Sekula nya endang mit tang nyu mit agi taun tu.

Apai indai pen enggai nyadi enda kiruh ga laban homework bala anak! Taja pia, arapka bala anak (enggau apai indai!) gaga sereta rindu belajar ba kelas Gred Dua taun tu!

Panggal Oh Panggal!

2010-09-06T11:21:00.000-07:00

Sapa kala macha cherita aku pasal meli panggal? Endang chukup bansa panggal udah dibeli laban ti selalu pedis pegu tauka pedis pala maya dani pagi. Kebuah pedis pala nya laban pala ti enda ngam gali ba panggal.

Panggal getah (latex) bisi - ulih mai ari Miri. Panggal foam bisi. Panggal memory foam bisi. Panggal buckwheat hull bisi. Mina panggal foam aja tau dikumbai murah ditu. Sida ke bukai nya enda kurang ari $40 siti.

Tu meh gamal buckwheat hull ti diisi dalam panggal. Nyu kerus kerus munyi panggal! Nyu mupuk ngena nya baru aku laban asaika enggai agi gali ba panggal memory foam pala/pegu aku! Pagi tadi maya dani, nyamai ga asai pala dibai tinduk atas panggal buckwheat.

Tu tadi ngiga panggal kapok. Bisi dijual ditu (ngoder ari internet) tang nya meh abis murah kiraka $43 siti!

Lembau ga asai mansut ke duit nyampau nya laban ti ngerundingka rega kapok di menua din enda datai dia. Tang kati ku enggau enti udah beguna? Nyu enggai ga kitai ngenat pedis pala tiap pagi!

Bisi ga aku tetemu alai orang mina nyual kapok. Murah ga mimit ari panggal ti udah tembu laban enti meli mayuh murah agi ga rega iya. Duncan rindu endar ngena panggal kapok aki iya di Miri din! Ka dibai iya pulai siti. Enti meli mayuh ulih ga ngaga medua tiga iti panggal neh!

Issh, berunding dulu!

Mickey Grove Zoo

2010-09-05T15:03:00.000-07:00

Meda nya kemisi sekula nyu ga abis (last weekend), aku alu mai bala raun ke Mickey Grove Zoo ti enda entu jauh ari rumah kami ditu. Taja tempat nya enda jauh, baru iya kami ti kin!! Nadai meh kami nemu ngelama tu alai nya ngemanah nya!

Bald Eagle

Labi Labi

Jelu Lemur - kaban King Julian

Mit amat saiz itit tu!

Burung Lorikeet - bekaler kaler!

Zoo nya enda besai, nadai entu mayuh jelu dia tang alai nya manah amat. Ukai semina zoo aja nya dia. Bisi Japanese Garden, bisi alai orang be-picnic, bisi alai anembiak bemain. Besai amat park nya alu rindu amat meda sida pun kayu besai besai dia alu lindung amat alai nya dia.

Bala anak agi belala kin, laban ti enda ampit bemain ba park. Mayuh orang din kemari, orang ti udah booking pondok - alai sida ngatur pengerami baka birthday, picnic etc. Aku ka meh kin baru laban maya kami ke kin, Japanese Garden nya udah tutup.

Bah, naka tu aja cherita sekali tu!

Gambar Hari Enam

2010-09-04T12:46:00.000-07:00

Baru sahari nya aku meda tawir ke mirah tu. Hari siti nadai agi aku meda. Sahari tu nadai ga aku meda. Lebuh tawir mirah tu bisi ayan (berapa iku enda sahari nya), bendar meh aku ngambar sida! Rindu amat aku meda. Nyu baka ngena ginchu mulut iya!

Nah, enda baka ngena ginchu indu tawir tu?!

Makin Tuai Makin Jadi

2010-09-03T14:24:00.000-07:00

Aku ketawa kediri ngenang ke diri ti gagit amat enggau hobi ngambar utai. Ni enda baka enti tak maya agi biak suba aku udah gila bemain enggau kamera?! Kada enda abis belanja kena meli perengka kamera?!

Bala nembiak diatu benasib endar. Ngambi ke chunto, niece aku agi belajar ba Swinburne, tang tebeli ke kamera canggih enggau mar agi ari enggi aku! Maya aku umur iya suba, ni nya bisi duit kena meli kamera ngemar nya? Naka kamera ti dibeli aku maya agi belajar ba IPT kelia iya nya Minolta semi-autofocus, ukai SLR kamera. Nya pen, pedis ngelepas duit kena meli kamera! Bejasa endar kamera aku nya suba!

Sekumbang aku udah pulai ari kemisi, bendar meh aku suping meli perengka kamera. Nyamai endar diatu, apin kitai meli utai, kitai ulih mandingka rega baka utai ke dijual ba eBay. Sekeda utai dibeli aku datai ari menua Hong Kong tauka menua China, laban rega utai nya jauh murah ari ke dijual ba menua kami ditu. Enda ngawa iya lubah agi datai asal kitai bisi jimat duit mimit! Bisi ga duit dikena meli utai bukai! Heheh.

Siti utai ti baru dibeli aku iya nya dikumbai super macro conversion lens. Lens dipasang ba mua telephoto lens alu utai mit tau endar dipeda besai ngena lens tu. Nya meh gamal indu utai earwig ti sangkut ba pukat emplawa digambar aku lemai kemari.

Isssh! Gian endar laban kamera!

Hari Tiga 01.09.2010

2010-09-01T15:56:00.000-07:00

Kangkung, daun ubi (agi belala!), serai, terung, ketula, buah epul, enggau avocado. Nya meh utai diangkut ari pasar sahari tu. Kami tiga menyanak begaut suping laban ti enggai ngelaban panas. Pama endar ga pengangat hari sahari tu!

♥ ♥ ♥

Can you see the heart bokeh in the background?

Maya suping tadi nemu kumplin pasal hari angat! Tang enti pasal ngambar utai ba luar, nadai irau ke hari panas! Pasang tupi, udah meh nya!

Fish Taco

2010-08-31T21:35:00.000-07:00

Lemai tu tadi kami menyanak bisi nurun ngagai Parents Orientation ba sekula bala anak. Hari dua minggu nyin ila, berengkah meh sekula taun 2010/2011 bala sida anak. Sinu ga aku ngenang laban mina setengah ari sida sekelas bisi nyambung pelajar ba sekula nya. Sekula nya sekula pribit (Christian school) alu kiraka mar meh enti dibanding enggau sekula perintah ti enda bebayar.

Sepemulai kami ari sekula, kami alu ngetu makai ba restoran Mexico. Aku mina makai sekeping pizza sebedau kami mupuk ke sekula, agi lapar meh asai perut. Nya ti nganjung diri makai taco ikan. Aku enda entu minat iga makai pemakai ari Mexico. Sida fish taco nya ka ga aku laban aku sigi rindu makai ikan.

Dua tiga hari tu tak lembau endar asai ka berapi. Makai pizza, makai mee segera, makai sandwich telu ... Buring amat! Pagila nurun ke pasar minggu ngiga utai ti dikedeka nyawa!

Model Semadi Nadai

2010-08-30T16:14:00.000-07:00

Semadi dipadah iya tau nepan basikal enggau niki pun kayu nya baru orang ka nyadi model! Tang nya meh, enti diasuh nepan basikal, nadai nemu jenuh ga orang. Mayuh ti enda menyana gambar!

Aku bisi diberi entua indu aku manual 50mm Pentax lens. Nya dikena ngambar model lemai kemari. Niece aku ka meda gambar diambi ngena lens lama tu. Tau dikenyadi ga lens tu, mina pedis di focus laban semua main manual!

Ditu orang udah nurun ari pun kayu. Nya pen, nyu nganti orang udah kating kating tunsang ba dan kayu nya baru tau ngambar.

Tu meh gamal model semadi nadai! Tau endar dikenyadi!

Roti Sardin

2010-08-27T13:10:00.000-07:00

Tu meh breakfast aku pagi tadi. Roti canai (buatan Malaysia) ulih meli ari supermarket, nya ti ngasuh nyamai amat enti tenguk ke roti canai. Tiga hari beturut turut aku makai roti canai enggau kari manuk laban ti bisi manduk kari kutai. Nyu enggai ga nyawa makai kari agi tang agi ka makai roti canai!

Tembu makai roti canai aku alu mai kupi pansut duduk ba luar sambil ninga radio enggau ngintai indu tawir tauka burung hummingbird. Hummingbird mina sekali aja nyenguk lebuh aku betitihka indu kesulai siku tu. Kepuas kesulai tu nutu bunga morning glory iya alu terbai ke bukai. Kitai ti agi belala ngambar iya!

Indu tawir ti bajik (bechurak gadung enggau biru) enggai endar inggap. Mina bansa siti tu aja ti ka inggap ba daun layu alu enda ibuh ke kitai. Nya meh digambar laban ti sigi rindu ngambar indu utai!

Nya meh sahari tu aku ngining macro lens ngambika utai digambar semak agi dipeda. Aisey, nganti bisi budget dulu!

Gambar Hari Empat

2010-08-26T17:14:00.000-07:00

Hari sahari tu enda ngangat hari kemari. Angin tasik bisi endar disepi muput sahari tu. Nya kebuah hari enda angat iga. Nitih ke ramalan cuaca ujung minggu tu lagi nyamai amat hari, asaika ukai musim panas.

Meda hari enda angat iga sahari tu, aku alu duduk ba luar pagi tadi ngemata sida indu kesulai enggau indu tawir ti bisi terbai sebelah kebun bunga. Indu tawir ke bechurak gadung tu enggai endar inggap, alu enti inggap nyu belalai ba daun pun gladiola. Bajik endar gamal indu tawir siku tu peda aku!

Bansa siti tu baru ka endar inggap ba daun gladiola ti udah layu. Nya ti ngasuh iya nyamai amat digambar. Maya musim panas mayuh endar indu utai mit mit terbai sebelah tanah. Nya ke nyadi pemakai indu tawir. Taun dulu asaika nadai aku meda sida indu tawir ngemayuh nya terbai sebelah tanah aku ditu. Rindu endar aku ngemata sereta ngambar sida!

Naka tu aja cherita semadi nadai aku sekali tu!

Daun Ubi

2010-08-25T14:40:00.000-07:00

Anang jeles, Lyana, meda aku bisi tetemuka daun ubi!

Pagi tadi kami tiga menyanak ngelaban hari angat nurun ke pasar. Minggu nyin tadi laban ti mindah, nadai sempat nurun ke pasar minggu. Nya meh aku nagang diri meli sida sayur. Bansa sayur ti dibeli ukai bansa ti tan disimpan dalam peti ais. Enggai enda dipanduk dalam sahari dua ga nya!

Gaga amat aku meda daun ubi pagi tadi. Agi tingat ke daun ubi enggau upa kechala ti dipanduk ipar aku kutai! Kelimpah ari daun ubi, aku bisi mega meli kantuk peria enggau kangkung. Sigi sayur dikerindu aku magang!

Akai, mayuh macham buah dijual maya musim panas tu! Aku mina meli buah cantaloupe enggau nectarine. Berat dibinching! Udah ga hari angat!

Ninga bala pangan ke diau di Houston nyerita pasal sida ti bulih cangkuk manis, bekareh meh aku ngiga tadi. Amat nadai kala meda cangkuk manis dijual ditu aku. Nya aku ngumbai sida ti datai ari menua China, Vietnam, Laos, Philippines tauka Thailand enda nemu makai cangkuk manis. Tang kati ku tau bisi di Houston deh? Dibeli ari kedai china Hong Kong, ku sida.

Arapka dudi ila bisi meh orang nanam enggau nyual sayur nya!

Angat!

2010-08-24T17:12:00.000-07:00

Apu, balat ga pengangat hari kami sahari tu! Enda aku berani pansut! Endang ari kemari hari kami ditu udah angat tang ninjik ga mina tiga hari aja hari ngangat tu enti nitih ke ramalan cuaca. Nadai kitai tan pen enti hari hari utai ngangat baka tu!

Taja hari angat dipeda, tang enda sehari hari ngangat tu. Tumu pagi chelap hari. Pia mega lebuh malam hari. Nya meh pagi tadi aku duduk ba luar ngipa burung hummingbird enggau indu tawir. Nigrup kupi sambil ninga radio meh aku ti duduk ba luar pagi tadi. Udah hari mupuk angat sepi aku, tama aku ke dalam rumah.

Rindu diri ga aku ti duduk ba luar laban burung hummingbird ti nutu bunga morning glory aku pagi tadi tak enda entu ibuh ke aku. Nya meh sempat endar aku ngambar iya.

Indu tawir mayuh terbai tang jarang inggap. Siku tu enggai ga inggap ba sida daun ti menyana agi dipeda. Enggai enda inggap ba tiang besi! Baka ti be-gymnastic iya nya!

Ma hari udah mupuk chelap lemai tu lagi, duduk baru aku ba luar. Kiraka lindung patio kami nya laban bisi pun eucalyptus ti ngelindung. Maya musim panas tu mata panas padam kiraka udah lalu pukul 7.30 lemai. Panjai meh siang kami maya dia taun.

Bah, nadai entu cherita ti ditusui ditu. Naka tu aja dulu!

Kebun Bunga 2010

2010-08-23T12:08:00.000-07:00

Dua tiga hari tu gaga amat aku meda sepun ari bunga gladiola aku benung bebunga. Maya aku ke mupuk nemuai ke menua ujung bulan lima kutai, bunga pun gladiola apin ngembai. Rugi amat asai aku enda ulih meda kebun aku penuh laban bunga gladiola.

Tu meh gamal kebun bunga aku lebuh aku ke pulai ari kemisi tengan bulan tu tadi. Repa sereta nadai meda bunga gladiola siti. Mina bekau iya aja ke agi tinggal. Nya meh aku tekenyit meda sepun tak nyumbuk bunga alu dua tiga hari tu pansut bunga. Bakaka sinu ke aku! Sepun dipeda aku bebunga pama meh! Enda ga punik!

Sida bunga morning glory enda ibuh sebut agi. Nyu melit pagar enggau pun bunga bukai ke dia. Puas endar muai nya ila! Meda sida bunga sigi rindu tang mantun rumput, muai iya ke udah mati - akai, lembau amat asai tulang!

Cherita Semadi Nadai Hari Enam

2010-08-21T12:22:00.000-07:00

Pun minggu tu tadi kami menyanak nemuai 3 malam ngagai entua aku. Ngelama tu, kami enda bemalam ba sida enti kami nemuai kin laban ti bisi endur diri empu ba Los Osos tang sekali tu kami bemalam ba rumah sida laban ti bisi penanggul ba Los Osos din.

Nya meh rindu amat aku meda pengalak kebun bunga entua aku maya musim panas tu. Ni iya munyi burung ti ngemayuh nya ga dia. Mayau kami (dibai tudah iya) rindang diri besegau sebelah kebun ngipa sida burung.

Dua pagi aku tumu pansut mai kamera laban ti ka ngipa burung hummingbird. Akai, amat rindu diri meh aku betitih ke burung tu! Sekeda gambar burung tu tau dipeda kita ba blog gambar aku ditu.

Bah, naka tu aja cherita sekali tu. Sida perengka ti dibai pulai ari menua tu tadi apin abis dikemas!

Buah Entekai

2010-08-20T08:20:00.000-07:00

"Udah mansau buah entekai kitai nya?" ku aku nanya Doug. "Kati kitai nemu buah nya udah mansau?"

"Enti udah kuning, mansau meh nya," ku iya. Nyau meh aku ngambi dua igi buah entekai ti endang kuning amat peda aku. Dua pun entekai ditanam iya taun tu, ditanam dalam pasu. Taun tu iya endang sengaja milih bansa entekai ti mit, alu endang bansa ti kena ngaga lauk.

Lebuh aku mela entekai, meda tak agi gadung senentang kulit iya. Heheh, reti nya apin entu mansau meh entekai nya tadi! Meda nya bakanya, digalau dulu ga sigi ari buah ti diambi aku nya.

Taja buah entekai nya apin entu mansau iga iya endang udah tau dipanduk. Nya meh lauk kami demalam alu lauk buah entekai nya diembal enggau babi panggang. Lapa deh, laju meh perahu!

Hummingbird

2010-08-17T10:51:00.000-07:00

Rindu amat aku nitih hummingbird ti rami amat ba kebun entua aku ditu. Iya ga sida enda entu takut meda mensia! Rindu amat aku meda background gambar siti tu laban ulih dipeda embun ba belakang. Tumu pagi aku pansut kemari mai kamera.

Ma siku udah inggap ba dan kayu, mansang nuan dia meh iya, enda terbai lari baka ti ditemu ba kebun aku di Galt din. Siga endar sida ba kebun aku. Ayung aku ba jendela deh enggai meda, alu terbai lari.

Kami menyanak ba rumah entua aku di Nipomo. Hari minggu kemari kami angkat laban Doug bisi nyadi saksi ba case makhamah ditu. Pagila (hari tiga) pulai kami. Lelak endar ga asai tubuh dibai mindah laban ti agi jetlag.

Taja diatu musim panas, ba menua Nipomo asaika ukai musim panas. Pagi hari tebal embun. Lemai hari bakanya ga. Ku jaku lemai kemari ka bejalai ngagai tebing tasik ngambar mata panas padam - ni mata panas bisi dipeda laban embun!

Bah, naka tu aja dulu!